Navenda Nûçeyan - Ji bo rêgirtin li belavbûna vîrusa koronaya nû COVID-19, kerentînekirina gund û taxan li Bakurê Kurdistanê berdewam e. Herî dawî li gundê Risîn ê navçeya Mehsert a Mêrdînê piştî ku testa Koronayê ya 8 welatîyan pozîtîv derket, ji alîyê qeymeqamîyê ve heta biryareke din gund hat kerentînekirin û ji xeynî rewşên awarte ketin û derketina ji taxê hat qedexekirin.
Li gor daxuyanîya ji alîyê Qeymeqamîyê ve hatîye belavkirin, armanca kerentînekirinê parastina xelkê û rêgirtin e li belavbûna vîrus a Koronayê.
Herwiha hatîye ragihandin ku ji xeynî rewşên awarte heta biryareke din ketin û derketina ji gund hatîye qedexekirin.
Li alîyê din kerentîneya li gundên Tibyada Qoserê, Qesra Ehmed, Qurdîs û Gundê Bernîşt ên Artuklu, mezraya Heramîye ya Dêrika Çîyayê Mazî, Dera Metîna ya Şemrexê û Barmana Stewrê yên Mêrdînê berdewam e.