Li girtîgehên Îran û Rojhilatê Kurdistanê bidarvekirin bênavber didome. Herî dawî li girtîgeha Qizilhîsar 3 kes û li girtîgehên bajarên Îsfehan, Kirmaşan û Cîroftê jî hejmarek girtiyên din hatin bidarvekirin.
Îro Yekşemê 2 girtiyên bi navên Husên Sûrî ê xelkê bajarê Toysirkanê ji parêzgeha Hemedanê û Muslim Ceiferî xelkê Nûrabadê ji parêzgeha Luristanê û kesekî Afgan ku nasnameya wî nehatiye zanîn, li girtîgeha Qizilhisara bajarê Kerec ê Îranê hatin bidarvekirin.
Dîsa girtiyek bi navê Nadir Xenîzade li girtîgeha bajarê Cîroftê û jinek 36 salî a bi navê Ferîba Melekî Şîrawend a xelkê bajarê Çiginî ya parêzgeha Loristanê li girtîgeha Parsîlon a bajarê Xuremabadê hatin bidarvekirin.
Hefteya derbasbûyî jî hejmarek kes li girtîgehên seranserê Îranê hatibûn bidarvekirin ku hejmara wan nehatiye zanîn.
Li gorî amaran, Îranê bi awayê navincî rojane 5 kes li girtîgehên xwe bidarve dike ku ev kiryara hovane weke alavek tepeserkirina zêdetir a ser xelkê tê bikaranîn.