Şeva borî kelekeke koçberan li Deryaya Egeyê têk çû. Çalakvanekî koçberan diyar kir ku polîsê Yûnanistanê hemû koçber rizgar kirine û rewşa wan baş e.
Renc Peşderiyê ku li Yûnanistanê çavdêriya koçberan dike ji Rûdawê re got, "Kelek doh serê sibehê ji Tirkiyeyê ber bi Îtalyayê ve bi rê ketibû û doh êvarî li Deryaya Egeyê di nav sînorê Yûnanistanê de ji ber hinek pirsgirêkan têk çûbû.
Heta derengiya şevê kes neçûbû hawara wan û jiyana wan di metirsiyê de bû lê paşê polîsê Yûnanistanê ew hemû rizgar kirin."
Li gorî gotinên Peşderî di kelekê de di navbera 90 û 94 kes hebûn û hemû jî Kurdên ji Başûr û Rojhilatê Kurdistanê bûn.
Renc Peşderî got, "Hemû koçber sax û silamet in lê ne diyar e ka polîsê Yûnanistanê dê wan dersînorî Tirkiyeyê bike yan na."
Li gorî Rêxistina Koçê ya Navneteweyî (IOM), îsal heta 12ê Tebaxê 85 hezar û 747 koçber gihiştine Ewropayê ku 80 hezar û 708 ji wan bi rêya deryayê bûye.
Her wiha di heman demê de, hezar û 212 kes di vê rêyê de winda bûne yan jî mirine, di demekê de ku par ev hejmar 3 hezar û 812 kes bû.