Li navçeya Amêdî ya Duhokê piştî 10 roj wendabûna 3 welatiyan eşkere bû ku ew di encama bombebarana firokeyên Tirkiyê de canê xwe ji dest dane.
Ev deh roj bûn sê welatiyên xelkê Dêrelûkê bi navê Muhsîn Spêrî, Hesen Sadiq û Sefer Sînî bêserûşûn bûn.
Biraziyê yek ji qurbaniyan, Cîhad Nûrî ji Rûdawê re derbarê bûyerê de ragihand ku pêştir 10 rojan mamê wî û du kesên din li Dêrelûkê çûbûn gundê xwe li devere Nêrwerêkanê û piştre bêserûşûn bibûn û got: “Îro çend kes çûne wê navçeyê û hat zanîn ku li Gundê Zêweyê ji ber bombebarana firokeyên Tirkiyê şehîd bûne.”
Ew sê kesên hatine kuştin temenê wan di navbera 55 heta 65 saliyê de bûn û hersê jî xelkê Dêrelûkê bûn.
Ew gund çend sal bûn ji ber şer û aloziyan hatibû valakirin û tenê rez û bostanên xelkê deverê li wê derê hene.
Berpirsê Şaxa 18 ya Partiya Demokrata Kurdistanê (PDK) Ebdullah Omer jî derbarê bûyerê de ji Rûdawê re got: “Ew kesên ku çûbûn terman bibînin bi telefonê ji me re gotin ku ew di encama bombebaranên Tirkiyê de hatine kuştin.”