Li Taxa Fabrîkayê ya bajarê Amedê, şaredariyê biryar da 20 xaniyên taxê bi sedema ne yasayî hatine çêkirin xirap bike.
Vê sibê tîmên şaredariyê ji bo xirapkirina xaniyan çûn taxê lê niştecihên taxê li dijî wan xwepêşandan kir û ew ji taxê derxistin.
Xelkê taxê nehişt xaniyên wan werin xirakirin.
Şaredariya Bajarê Mezin a Amedê ku ji aliyê qeyûm ve tê birêvebirin, ji bo xirakirina 20 xaniyan tîmên xwe şandin Taxa Febrîkayê.
Tevî ku doza xirakirina van malan hîn li dadgehê ye û dadgehê hîn biryar li ser nedaye, şaredariyê xwest wan xaniyan birûxîne.
Bi keviran da pey tîmên şaredariyê
Niştecihên taxê li dijî biryara şaredariyê kom bûn, nerazîbûna xwe nîşan da û bi keviran da pey tîmên şaredariyê.
Xelkê Taxa Fabrîkayê got ku ew nahêlin xaniyên wan bên rûxandin.
Piştî vê çalakiyê, niştecihên taxê ji Rêveberiya Ewlehiyê Amedê daxwaza hevdîtinê kir.
Piştî hevdîtinê biryar hat dayîn ku ew xaniyên navborî neyên hilweşandin.
Li gorî agahiyan, heta ku dadgeh li ser van malan biryarekê nede dê şaredarî ti hewldaneke din a rûxandina xaniyan nede.