Bi sedan welatî û xwendekarên Kobaniyê, ji bo şermezarkirina polîtîkayên guhertina navên gund û navçeyên Kurdî û ferzkirina navên Erebî, xwepêşandeneke protestoyî li dar xist.
Meşa ku bi dirûşma "Zimanê me hebûna me ye, Kobanî rûmeta me ye" ji Qada Jina Azad dest pê kir û heta Qada Şehîd Egîd berdewam kir.
Di çalakiyê de hate diyarkirin ku Kobanî bi xwîna şehîdan ji destê DAIŞê hatiye rizgarkirin û gelê herêmê bi tu awayî rê nade ku nasname û navên wan ên resen werin jêbirin an jî werin guhertin.
‘Navê vê derê Kobanî ye, ne Eyn Ereb e’
Di mîtînga piştî meşê de, nûnerên saziyên sivîl û siyasî daxwaz kirin ku zimanê Kurdî û mafên gelê Kurd di destûra nû ya Sûriyeyê de bi awayekî fermî werin misogerkirin.
Endamê Komîteya Navendî ya PDK-Sê Gêlo Îsa tekez kir ku navê bajêr Kobanî ye û bikaranîna navê "Eyn Ereb" nayê qebûlkirin, herwiha Hevseroka Meclîsa Malbatên Şehîdan Sara Xelîlê jî diyar kir ku zarokên wan bi salan e bi zimanê dayikê perwerdeyê dibînin û heta mafên wan neyên naskirin dê têkoşîna wan a ji bo parastina rûmeta Kobaniyê berdewam bike.