Îdîanameya Endamê Lijneya Birêveberiya Baroya Stenbolê parêzer Firat Epozdemîr ku bi hînceta "endamtî û propagandeya PKKyê" hatibû girtin, hat amadekirin û ji bo wî heta 15 sal cezayê girtîgehê tê xwestin.
Di îdîanameyê de hatiye gotin ku “Epozdemir Serokê HDKê yê Baxcilarê bûye û di binesaziya rêxistinê de xebitiye, her wiha li ser fermana HDK û PKKyê sala 2015an bûye endamê grupa WhatsAppê ya bi navê `Dîren Cizre`yê.”
Di nivîsê de her wiha hatiye gotin ku Epozdemir bi navê rêxistinê li Cizîra Botan xebat meşandiye û bi daxwaza xwe û bi zanebûn di nav hiyerarşiya PKK-KCKyê de cih girtiye.”
Di çarçoveya lêpirsîna derbarê xebatên PKK/KCKyê de ku ji aliyê Serdozgeriya Komarê ya Stenbolê ve hatî destpêkirin, roja 23ê Kanûna Paşîn a 2025ê dema Firat Epozdemir ji Civîna Parêzvanên Konseya Ewropayê vedigeriya li Balafirgeha Navneteweyî ya Stenbolê hat desteserkirin.
Epozdemîr piştî lêpirsînê roja 25ê Kanûna Paşîn bi tohmeta “propagandaya rêxistina terorê kiriye” û “endamê rêxistina terorê ya çekdar e” ji aliyê dadgehê ve hat girtin.