Wezareta Derve ya Amerîkayê hişyarî da ku geştyar neçin Tirkiyê. Wezareta Derve ya Amerêka da zanîn ku ev bang ji ber zêdebûna rêjeya Coronayê û metirsiya desteserkirina kêyfî û terorê hatiye kirin.
Wezareta Derve ya Amerîkayê li ser malpera xwe ya fermî derbarê Tirkiyê de hişyarî da welatiyên xwe daku “neçin Tirkiye”. Di daxuyaniyê de hişyariyên Navenda Kontrol û Rêgirtin Li Nexweşiyan a Amerîkayê (CDC) derbarê Coronayê de jî hatin bibîrxistin û tê gotin ku rêjeya kesên li Tirkiyê bi coronayê dikevin zêde bûye.
Herwiha navên parêzgehên Şirnex û Colemêrgê yên Bakurê Kurdistanê jî hatine dayîn û derbarê herêma sînorê Suriyê de hişyariya xwe herî kêm 10 kîlometreyan ji sînor dûr bigirin hat dayîn.
Di daxuyaniyê de tê gotin: "Plana komên terorîst bo egera pêkanîna êrîşan li Tirkiyê berdewam e. Dibe ku komên terorist cîhên geştiyarî, navêndên çûn û hatinê, navêndên kirîn û firotinê, avahiyên rêveberiyên xwecîhî, otel, restorant, cihên olî, navendên werzîş û çandê, saziyên perwerde, firokexane û cihên din jî bikin armanc."
Di berdewamiya daxuyaniyê de tê gotin: "Hêzên Ewlekariyê, bi hezaran kes welatiyên Amerîkayê jî di nav de bi armancên siyasî û îdîaya peywendiya wan ligel rêxistinên terorist heye desteser kirine. Welatiyên Amerîkayê jî li Tirkiyê rûbirûyê qedexeyên geştiyariyê bûn û ji ber vê nikarîbûn ji Tirkiyê vegerîn. Li Tirkiyê kesên beşdarî çalakiyên ji aliyê hikûmeta Tirkiyê ve nehatine erêkirin dibin, tên desteserkirin. Herwiha rexnekirina hikûmetê û rexneyên di medya civakî de jî tên kirin, dibe sedem ku ew kes bên desteserkirin."
(Rûdaw)