Navenda Nûçeyan- Navenda ragihandina Hêzên Sûrîyeya Demokratîk ragihand ku hêzên wê yên ewlekarî û rûbirûbûna terorê li Dêre Zorê li beramberî şaneyên razayî yên DAIŞê, di 28ê Mijdarê û 22ê Mijdarê de operasyonên taybet pêkanîne û di encamê de bi giştî 25 endamên DAIŞê hatine girtin. HSDê destnîşankir ku hin ji DAIŞyên ku hatine girtin, ji kampa Holê revîyabûn û destê wan di teqîna li Hesekê û zîndana Hesekê de hebûn.
HSDê dîyar kir ku di van operasyonên ku pêk hatine de serkirdeyê nivîsîngeha girtîyên DAIŞê yê bi navê Erkan Hisên ( Mihemed Salih Elelî) jî hatîye desteserkirin. Herwiha HSDê da zanîn di operayonan de, dema ku du DAIŞîyên di nav şaneyê de cîh digirtin xwestine birevin hatine kuştin.
Li Reqayê jî Şaneyeke DAIŞê ya veşartî hate girtin
Hêzên Ewlekarîya Navxwe yên Rojavayê Kurdistanê ragihandin, ku li bajarê Reqayê şaneyeke veşartî ya DAIŞê hatîye girtin, ku ji 14 kesan pêk tê.
Li gorî daxuyanîya hêzên asayîşê, di encama operasyonekê de, bo ser şaneyeke veşartî ya DAIŞê, 14 kes hatine girtin, ku 3 ji wan jin in.
Li gorî zanyarîyên ku hatine belavkirin, wê şaneya veşartî ya DAIŞê, endamên wê rêxistinê ji cihên cuda vediguhestin nav sînorê Rojavayê Kurdistanê, da ku êrîşan encam bidin.
Kesên ku hatine girtin, kadroyên destpêkê yên rêxistina DAIŞê ne, ku niha bi rêkxistina şaneyên veşartî re mijûl dibûn.
Çavkanî: Rûdaw