Navenda Nûçeyan - Rêveberê gorên komî yê wezareta şehîdan û enfalbûyên herêma Kurdistanê Sîrwan Celal ji BasNewsê re ragehand: ‘’Piştî demekî dirêj kar li ser kirinê, nimûneyên hêstîyên 172 meyîtên enfalbûyan ji ezmûngehên pêwîst re derbasbûn û encam derketine û ew meyît li qeza Selmanî ya ser bi parêzgeha Semawe hatine dîtin. Ji bijîşkê dadî yê Bexda re hatibûn şandin ku nasnameyên wan bên aşkera kirin.’’
Herwaha got: ‘’Karê gerîn û dîtina meyîtên enfalbûyan proseyekî bi bêhnfirehî û hestyar e û dem jî dixwaze. Ji ber wê wek wezareta şehîdan emê berdewam bin heta bên dîtin û wan meyîtan hemûyan jî bînin.’’
Sîrwan Celal got: ‘’Amadekarîyên me destpê kirine bo vegerandina wan meyîtan. Dê ji goristana Banî Meqan a Germîyanê re bên veguhestin. Eger ti pirsgirêk û astengîyek tine be, roja 14.04ê ku salvegera enfalê ye bi merasîmekî ve ew meyît dê ji axê re bên spartin, lê nayê zanîn ew meyît ên xelkê kîjan navçeyekî herêma Kurdistanê ne.’’