Hizba Demokrata Kurdistanê (HDK), du gencên din yên Rojhilatê Kurdistanê radestî dadgehê kirin ku li gor wan, ew herdu kes sîxur bûne û destê wan di mûşekbarana baregeha partiya a li Koye hebû.
Di 8 îlona 2018ê de civîna komîteya navendî ya HDKê li Koye bibû armanca êrîşeke mûşekî ya Îranê û ji ber wê 16 kes ku 6 kes ji wan endamên serkirdatiya partiyê bûn jiyana xwe ji dest dan.
HDKê daxuyaniyek belav kir û tê de ragihand ku komîteya wan a ewlekariyê piştî lêkolîneke hûr, 2 kes girtine ku derbasî nava refên pêşmergeyên wan bûne.
Hizba Demokrata Kurdistanê dibêe, kesên bi navê, Keywan(Soran) Feyzî û Feraz Selewatî, xelkê parêzgeha Sine ya rojhilatê Kurdistanê ne û îtiraf kirine ku kar bo komara îslamî ya Îranê kirine.
HDKê daxwaz ji desteya dadweriyê ya Herêma Kurdistanê kir ku bi bal kişandin ser rewşa giran a wê tawanê û îtirafkirina tawanbaran, hikim li ser vê dosyeyê bidin û tometbar cezayê wê tawana metirsîdar werbigrin ku bi hevkariya wan hatiye kirin.