Hikûmeta Iraqê di nêzîktirîn dem de girêbestekê ligel Kompanya Chevron a Amerîkî ya petrolê îmze dike. Wezîrê Derve yê Iraqê Fuad Husên di serdana xwe ya Washingtonê de ragihand ku her di wê serdanê de girêbesta navbera hikûmeta Iraqê û Chevronê tê îmzekirin.
Li gor Fuad Husên, rêkeftin di qonaxa dawî de ye û di zûtirîn dem de tê ragihandin. Hinek çavkanî behsa wê yekê dikin ku kompanya Amerîkî kar li ser dîtin û derxistina petrolê li kêlgehên petrolê yên başûrê bajarê Nasirîye dike ku tê texmînkirin şîyana wan 4 milyar û 400 milyon bermîl be.
Berê medya Amerîkî dabû zanîn ku di serdana şanda Iraqî de bo Washingtonê û di çarçoveya civînên wê şandê de li Koşka Spî, rêkeftinek an jihevfamkirinek di navbera hikûmeta Iraqê û Kompanya Chevronê de tê ragihandin.
Gotûbêjên navbera Chevron û hikûmeta Iraqê bo dema salekê ye berdewam in, lê piştî kuştina Fermandarê Supaya Qudis Qasim Suleymanî û destpêkirina alozîyên navbera hinek alîyên Iraqî û Amerîkayê gotûbêj rawestîya bûn. Dema Mistefa Kazimî di meha Gulanê de postê serokwezîrê Iraqê wergirt, gotûbêjan careke din destpê kir.
Ji xeynî rêkeftina Chevron û Bexdayê, tê çaverêkirin ku Iraq û Amerîka di warê gaza xwezayî û teknolojîyê de çend girêbestên din îmze bikin. Wezîrê Derve yê Amerîkayê jî dibêje, rêkeftina warê enerjîyê di navbera Iraqê û Amerîkayê de demeke nêzîk tê ragihandin.
Kompanya Chevronê ya Amerîkî niha li Herêma Kurdistanê, Îsraîl, Kuwêt û Siûdîyê di warê petrol û enerjîyê de kar dike û bi girêbesta ligel hikûmeta Iraqê jî dixwaze karên xwe li Rojhilata Navîn berfirehtir bike.
Rûdaw