Îro roja cîhanî ya kesên winda ye. Şêwirmendê Tora Hevpeymaniya Kêmaniyên Îraqê amajeyê dide, “Ew zarokên Êzidî yên ku li ser destê DAIŞê hatine windakirin û hêşta zindî ne, ji ber ku wê demê hêşta biçûk bûn, niha nasname û war û kesûkarên xwe nas nakin.”
Şêwirmendê Tora Hevpeymaniya Kêmaniyên Îraqê Ezîz Şerkanî îro (În, 30.08.2024) taybet ji K24ê re got, “Rewşa kêmaniyan li Herêma Kurdistanê li beranberî Îraq û Rojhilata Navîn gelek baştir û pêşkeftîtir e.”
Ezîz Şerkanî amaje jî da, “Komkujiya Êzidiyan li sala 2014ê ji aliyê DAIŞê ve li ser astê cîhanê mezintirîn komkujiya sedsala bîst û yekê ye.”
Navbirî ron jî kir, “Heta niha zêdetirî du hezar û 500 Êzidiyan winda ne, hejmareke wan hatiye jenosîdkirin û hejmarek li kempa Holê ye û heta niha nehatiye azadkirin û herwesa hene jî ku ji bo welatên din û xasma welatên Erebî hatine veguhastin.”
Şêwirmendê Tora Hevpeymaniya Kêmaniyên Îraqê herwesa got, “Ên ku hêşta zindî ne û winda ne dibin du hezar kes û piraniya wan jî jin û zarok in.”