Navenda Nûçeyan- Serokomarê Tirkîyê radigihîne, ewê avedankirina herêma ewle di civîna NATOyê de bînin rojevê û Mîre Qeterê soz daye ku ji bo çêkirina xanî û avahîyan li herêma ewle dê alîkarîyê bikin.
Serokomarê Tirkîyê Recep Tayîp Erdogan di vegera ji Qeterê de ji rojnamevanan re axivî û got, mijara avedankirina Herêma Ewle ya di bin kontrola Tirkîyê de anîye rojeva Trump û Pûtin û ewê di civîna NATOyê ya 3'ê Berçile de jî bînin rojevê.
Erdogan got, ew destpêkê dixwazin li navbera Girê Spî û Serê Kanîyê bi kûrahîya 30 kîlometre û dirêjahîya 120 kîlometre herêmek ava bikin û tê de xanî, nexweşxane, dibistan û mizgeft hebin ku nîmûneya vê di cîhanê de nîn e.
Erdogan got, Qeterê soz daye ku di avedankirina herêma ewle de alîkarîyê bike û da zanîn, Komkara Erebî li dijî Tirkîyê helwest girtîye, lê wan heta niha 40 milyar Dolar ji bo penaberan xerc kirine.
Çavkanî: K24