Navenda Nûçeyan- Doh roja Çarşemê (11.12.2019), hevserokên Encûmena Xwecihî ya Girê Spî li Eyn Îsa Ebdulhemîd el Ebid û Hêvîn Ismaîl ligel berpirsên serbazî yên Rûsyayê civîyan.
Di civînê de ku li binkeya serbazî ya Rûsî li Eyn Îsa hat lidarxistin, hevserokên Encûmena Xweciîh ya Girê Spî nameyeke arasteyî hikûmeta Rûsyayê kirin.
Hevserokê Encûmenê Hebdulhemîd el Ebid aşkere kir ku wan di nameya xwe de çend daxwaz li hikûmeta Rûsyayê kirin.
El Ebid got: “Me 5 daxwaz pêşkêş kirin ku ew jî ev in: Girîngîya bidawî anîna dagirkerîya Tirkîyê, garantîkirina vegera koçberan, rawestandina binpêkirinan li navçeyên dagirkirî, agirbest û vekirina rîya M4.”
Hevserokê encûmenê dîyar kir, ku fermandarên Rûsî piştevanîya daxwazên wan kirine û vekirina rêya M4 destpêka cîbicîkirina wan daxwazan bû.
Çavkanî: Basnews