Piştî rûxandina rêjîma Beşar Esed li Sûriyê, pêleke nû ya vegera Kurdên Efrînê bo ser warên wan dest pê kiriye. Welatiyên ku vedigerin dibêjin, malên wan hatine talankirin û tiştek tê de nemaye, lewma pêwîstiya wan bi alîkariyên mirovî heye, da ku karibin jiyana xwe ji nû ve birêxistin bikin. Li gel vê yekê, rayedarên xwecihî dibêjin ku rêjeya Kurdan li herêmê roj bi roj zêdetir dibe.
Serpêhatiya Vegeriyayiyan: Hêvî û Zehmetî
Mihemed, yek ji Kurdên ku piştî salên dirêj ên koçberî û derbederiyê vegeriyaye gundê xwe li Efrînê, ji K24 re axivî û da zanîn ku rêwîtiya koçberiyê gelek dijwar bûye û ew rastî gelek zehmetiyan hatiye, ji nebûna aramiyê bigire heta zehmetiya xwe guncandina bi jiyana xerîbiyê re.
Mihemed got: “Dema ez vegeriyam, min dît ku tiştek di mala min de nemaye, her tişt hatibû talankirin.” Tevî vê yekê, ew bi biryar e ku li ser axa xwe jiyaneke nû ava bike.
Dayika Ehmed jî, weke gelek koçberên din, ji ber şer neçar mabû mala xwe biterikîne. Piştî vegerê, wê jî dît ku tiştek di mala wê de nemaye û hemû kelûpelên wê hatine talankirin.
Dayika Ehmed bang li rêxistinên mirovî dike û dibêje: “Pêwîstiya me bi alîkariyê heye da ku em karibin jiyana xwe berdewam bikin.”
Rêjeya Kurdan Zêde Dibe
Serokê Encûmena Xwecihî ya ENKSê li Efrînê Ehmed Hesen diyar kir, ji dema guhertinên dawî û ketina rêjîma Esed ve, vegera xelkê Efrînê bo malên wan didome.
Ehmed Hesen ji K24 re got: “Rojane Kurd vedigerin û Erebên ku li Efrînê hatibûn bicihkirin jî ji bajêr derdikevin. Niha rêjeya Kurdan li herêmê zêde bûye û di navbera %70 heta %80 de ye.”
Banga Alîkariyê û Amarên Vegerê
Malbatên ku vedigerin Efrînê, bi taybetî ewên ku malên wan hatine talankirin, daxwaz ji rêxistinên mirovî dikin ku alîkariya wan bikin da ku bikaribin ji nû ve li ser pêyên xwe bisekinin.
Li gorî texmînan, heta niha zêdetirî 200 hezar Kurd vegeriyane Efrînê. Hat ragihandin ku piştî ketina rêjîma Esed, karwanê vegera Kurdan bo Efrînê nesekiniye û bi berdewamî didome.
K24