Navenda Nûçeyan- Seroka komîsyona deverên Kurdistanî yên li derveyî Herêma Kurdistanê ragihand, ewê pêşnîyar û nêrînên xwe li ser venivîsîna madeya 140 ya Destûra Iraqê bidin komîteya venivîsîna Destûrê.
Parlementera kurd û seroka komîsyona deverên Kurdistanî yên li derveyî Herêma Kurdistanê ya parlementoya Kurdistanê, Ciwan Rojbeyanî ji BasNewsê re got, bi qasî ku haya me jê heye piranîya madeyên Destûra Iraqê (Qanûna Esasî) dê bên guhertin û ji nû ve bên nivîsandin, ji ber wê jî em dixwazin pêşnîyar û nêrînên xwe li ser wan madeyên ku pêwendîya wan bi kurdan re hene, bidin komîteya venivîsîna Destûrê.
Ciwan Rojbeyanî her wiha got, ji bo wê jî emê hefteya bê li ser madeya 140 ya Destûrê, ku girêdayî qedera deverên Kurdistanî yên li derveyî Herêma Kurdistanê ye, semînarekê pêk bînin û li ser wê gotûbêj bikin ku çi nêrîn û pêşnîyrekê li ser wê madeyê bidin komîteya venivîsîna Destûrê.
Parlementoya Iraqê ji ber fişara xwepêşandanên Iraqê biryar dabû Destûra wî welatî were hemwarkirin û guhertin.