Li Rojhilatê Kurdistanê, agir bi daristanên bajarokê Rebet ê ser bi bajarê Serdeştê ve ket û di encamê de bi dehan hektar daristan şewitîn.
Çavkaniyên xwecihî ji bajarê Serdeştê ragihandin, ku ji şeva pêncşemiyê ve li nêzîkî gundên Mela Şêx, Bêzîlê û Şînwê agir bi daristanan ketiye û ji ber bayê zêde, di nava demek kurt de agir belav bûye û berdewam e.
Tîmên vemirandina agir û çalakvanên jîngehparêz ên Serdeştê hewl didin, agir kontrol bikin, lê ji ber bayekî zêde, heta niha hewldanên wan bê encam bûne û şewat li deverê berdewam e.
Li gor zanyariyên destpêkê, di encama şewatê de heta niha herî kêm 20 hektar ji daristanên Serdeştê şewitîne.
Serokê Fermangeha Jîngeh û Avdêriyê yê Serdeştê Kamîl Hisêynî ragihand, ku agir bi cihên bilind ên çiyayan ketiye û lewma jî tîmên agir vemirandinê nekarîne bi hêsanî xwe bigihînin cihê şewatê û diyar jî kir ku hîn jî ziyanên wê şewatê bi temamî nayên zanîn.
Bajarê Serdeştê ser bi parêzgeha Urmiye ya Rojhilatê Kurdistanê ve ye û li wî bajarî zêdetir ji 80 hezar hektar daristan heye.