Piştî derketina encamên testa DNAyê, cenazeyên 22 Kurdên Êzidî bo Şingalê hatin vegerandin û biryar e sibe bên veşartin.
Efserê Desteya Vekolîn û Komkirina Belgeyan a Dihokê Şakir Mehmûd got, “Nêzîkî 7 sal in tenê cenazeyên 318 Kurdên Êzidî vegerandine Şingalê.”
Sala 2014an DAIŞê êrişî Şingalê kir û li hemberî Kurdên Êzidî komkuj pêk anî.
Efserê Desteya Vekolîn û Komkirina Belgeyan a Duhokê Eqîd Şakir Mehmûd li ser mijarê ji Rûdawê re axivî:
“Ji sala 2018an ve zêdetirî 760 cenaze ji Şingalê ji bo testa DNAyê şandine Bexdayê.
Ji wê demê ve piştî derketina encaman, beşek ji wan bi 7 karwanan hatine vegerandin.”
Li gorî Eqîd Şakir Mehmûd, cenazeyên ku dê sibe bên veşartin zêdetir xelkê gundên Koço û Herdanê û deverên Til Qeseb û Til Benatê ne û got:
“Cenaze îro gihiştin Dadweriya Bijîşkî ya Mûsilê û sibe saet di 09:00an de dê bi merasîmekê li Şingalê bên veşartin.”
Ev karwana heştemîn a vegerandina cenazeyên qurbaniyên Şingalê ye ku piştî naskirina nasnameyên wan bi rêya testa DNAyê tên veşartin û heta niha bi vî awayî hatine vegerandin:
- Karwanê yekem: 62 cenaze
- Karwana duyem: 42 cenaze
- Karwana sêyem: 43 cenaze
- Karwana çarem: 55 cenaze
- Karwana pêncem: 21 cenaze
- Karwana şeşem: 41 cenaze
- Karwana heftem: 32 cenaze
- Karwana heştem (sibe): 22 cenaze
Berê Serokê Tîma Vekolîna Gorên Komî ya Îraqê Ehmed Qusey ji Rûdawê re ragihandibû, tîmên wan li Şingalê di lêgerîna gorên komî de berdewam in û heta niha 62 gorên komî li Şingalê hatine vekolan û 30 gorên din jî mane ku bên vekolan.
Ji wan 62 gorên komî yên Şingalê 600 cenaze hatine derxistin, 250 cenaze piştî test û naskirinê radestî xizmên wan hatine kirin.