Bi dehhezaran koçberên Efrînî yên ji 2018an ve li bajarokê Til Rifet û herêma Şehbayê bicîh bûbûn, careke din koçber bûn û beşeke mezin ji wan gihîştin navçeyên HSDê li Tebqa, Reqa û Kobanê.
Piştî kontrolkirina Til Rifet û gundên herêma Şehbayê yên li bakurê Helebê ji aliyê grûpên çekdaran ve, bi dehhezaran koçberên Efrînê careke din koçber bûn û beşeke mezin ji wan gihîştin Teqba, Reqa, Kobanê û navçeyên din ên di bin kontrola HSDê de.
Herwiha beşek ji malbaran jî vegeriyan Efrînê û ji aliyê Dezgeha Xêrxwaziya Barzanî, ENKS û saziyên din ên mirovî ve pêşwazî lê hatin kirin.
Bajarokê Til Rifet û herêma Şehbayê di navbera herêma Efrîn û Helebê de ne û di destê YPGê de bûn. Ji dema dagîrkirina Efrînê ji aliyê artêşa Tirkiyê û grûpên çekdar ên ser bi wê ve di Adara 2018an de, dora 200 hezar koçberên Efrînî li 5 kampan û li gundên wê herêmê hatibûn bicihkirin.
Di vê derbarê de, Rêveberê Ofîsa Kampan û Karûbarên Koçberan a Rêveberiya Xweser Şêxmûs Ehmed got, zêdetirî 30 hezar malbat ji Til Rifat û herêma Şahbayê gihîştin Tebqayê.
Şêxmûs Ehmed got jî, kêmasî ji aliyê rêxistinên mirovî ve di pêşkêşkirina alikariyan de hene, ji ber ku qeyranê û karînên Rêveberia Xweser kêm in.
Şêxmûs Ehmed bang li Neteweyên Yekgirtî kir ku deriyê Til Koçer di zûtirîn dem de ve û bi rêya wî derî alîkariya koçberan li herêmê bike.
Rêveberê Ofîsa Kampan û Karûbarên Koçberan a Rêveberiya Xweser amaje bi wê kir, dibe ku hejmareke din ji koçberan ji Heleb û derdora wê bigihin herêmê.
K24