Amnesty International (Efûya Navneteweyî) ragihand ku 2 hezar û 600 Kurdên Êzidî heta niha jî winda ne.
DAIŞê 3yê Tebaxa 2014an êrişî Şingalê kir.
Zêdetir ji 3 hezar jin, mêr û zarokên Êzidî bi awayekî hovane hatin kuştin û herî kêm 6 hezar 800 kes hatin revandin ku piraniya wan jin û zarok bûn.
Bi sed hezaran Kurdên Êzidî yên ku ji vê komkujiyê rizgar bûn jî ji warê bav û kalên xwe bûn û ketin ser rê û dirbên koçberî û penaberiyê.
Sibe salvegera 10an a vê komkujiya giran e lê Kurdên Êzidî hîn jî tertûbela ne û piraniya wan dûr ji warê xwe ne.
Amnesty Internationalê di rapora xwe ya herî nû de ragihand ku 2 hezar û 600 Kurdên Êzidî heta vêga jî winda ne û aqûbeta wan ne diyar e.
Rapora Amnesty Internationalê pêşbînî dike ku bi sedan Kurdên Êzidî li Rojavayê Kurdistanê li kampan bin.
Bi hezaran DAIŞî û jin û zarokên wan li kampên Hol û Rojê yên li Rojavayê Kurdistanê girtî ne.
Rapor amaje pê dike ku piraniya wan li kampên li Rojavayê Kurdistanê (bi taybetî jî li Kampa Holê) di nav jin û zarokên DAIŞê de girtî bin.