Medyaya Amerîkayê li ser navê berpirsên Pentagonê ragihandine, piştî dûrxistina Tirkîyê ji programa kirîna wan balafirên şer, ji ber kirîna sîstema mûşekî ya S-400 ji Rûsyayê, Pentagonê biryar daye 8 ji wan balafiran nede Tirkîyê û ew balafir radestî artêşa Amerîkayê hatine kirin.
Malpera Yeni Şafakê jî ragihandîye, 8 balafirên F-35A Lightning II ku li Amerîkayê bo Tirkîyê hatibûn çêkirin, radestî Hêzên Esmanî yên Amerîkayê hatine kirin.
Tirkîyê girêbesta kirîna 100 balafirên F-35 li gel Amerîkayê heye, lê belê ji ber kirîza sîstema mûşekî ya S-400 ya Rûsî û alozbûna peywendîyên navbera Waşington û Enqerê, Tirkîye ji wê programê hatîye dûrxsitin.
Bihayê her balafireke F-35 digihe 77 milyon û 900 hezar dolarî.
Kompanîya sereke ya berhemanîna balafirên F-35 ku kompanya Lockheed Martin a amerîkî ye, heftîya bihorî navê Tirkîyê ji lîsteya welatên berhemhênerên hevbeş ên vê firokeyê derxistibû.
Li alîyekê din, çarenivîsa 6 balafirên din ên F-35 ku pêştir bo Tirkîyê hatibûn berhemanîn û ketibûn di bin mulkîyeta wî welatî de, lê belê her li Amerîkayê mabûn û hêj radestî Enqerê nehatine kirin, ne dîyar e.
Tirkîye yek ji 9 welatên beşdar di berhemanîna balafira pêşkevtî ya F-35 de ye û hin parçeyên wê balafirê ji alîyê wî welatî ve tên çêkirin.
Ji ber kirîna sîstema mûşekî ya S-400 ji Rûsyayê, ku sîstemeke berevanîya esmanî ye, peywendîyên Amerîka û Tirkîyê gelek aloz bûne.