Wezareta Derve ya Almanya, raportek di derbarê Tirkiyê de belav kiriye û dibêje, li wî welatî azadiya raderbirînê rawestiyaye.

Raport bi sernavê "serlêdana mafê penaberiyê û rewşa dîportkirinê" hatiye nivîsandin û dibêje, "Destûra Tirkiyê azadiya ragihandin û raderbirînê diparêze. Lê di rastiyê de ev maf niha nemane". Tê gotin ku li Tirkiyê medya nivîskî û ragihandin jî bi yek dengî belav dibe û nerînên cuda têde nayêne dîtin.

Raportên Wezareta Derve ya Almanya ji bo saziyên dayîna mafê penaberiyê û dîportkirinê têne amadekirin û ew sazî jî li gorî van raporan biryarê di derbarê penaxwazan de didin.

Rêveberiya Koç û Penaberan ya Federal BAMF, rêveberiyên karûbarên biyaniyan û dadgeh, bi riya van raporan, rewşa welatên ku penaber jê hatine dişopînin û biryaran didin.

Sala derbasbûyî 10 hezar û 800 hemwelatiyên Tirkiyê, li Almanya daxwaza mafê penaberiyê kirine. Nîvê vê hejmarê mafê penaberiyê wergirt.