Navenda Nûçeyan- Rewangeha Sûrî ya Mafên Mirovan belav kir, Tirkîye bi tomarkirina navên çekdaran Sûrî ji bo çûna Lîbyayê berdewam e û heta niha hejmara çekdarên Sûrî yên gihîştine Lîbyayê gihîştîye 2400 çekdarî.
Rewangehê dîyar kir, niha jî 1700 çekdarên opozîsyona Sûrîyê li serbazgehên Tirkîyê tên rahênankirin, ji bo lîbyayê bêne veguhastin.
Amaje bi wê da, tomarkirina navên çekdaran li Efrînê û navçeyên din ên di bin kontrola grûpên çekdar de berdewam e û bi taybet çekdarên grûpên Lîwaya El Mutesêm, Firqeya Sultan Silêman, Lîwaya Siqor Şemal, El Hemzat, Feyleq El Şam, Silêman Şah û Lîwaya Semerqend navên xwe tomar dikin.
Li gor zanyarîyên Rewangeha Sûrî ya Mafên Mirovan, Tirkîye dixwaze 6 hezar çekdarên Sûrî bibe Lîbyayê.
Dîyar kir jî, di encama şer û pevçûn de heta niha 24 çekdarên opozîsyona Sûrîyê li Lîbyayê hatine kuştin.
Rewangehê pêştir jî belav kiribû, çekdarên Sûrî bi rîya firokeyên Tirkîyê bo Lîbyayê têne veguhastin.
Li gor rêkeftina navdewletî ya li dijî biçekirina çeteyan a ser bi Netewên Yekgirtî be, rahênankirin û bikaranîna çeteyan tewan e.
K24