Şanda CHPê ku li Hewlêrê ye, serdana Polîtbûroya PDKê kir û li gel Serok Mesûd Barzanî civiya. Serok Barzanî tekez kir, “qedera gelên navçeyê ew e ku li gel hev bijîn û baştirîn rê jî birayetî, aştî, çareserkirina kêşeyan û nehiştina zimanê înkarkirina beranber e.”

Li Selaheddîn Serok Mesûd Barzanî pêşwazî li Şandeke Bilind a Partiya Komarî ya Gel (CHP) a bi serokayetiya Cîgirê Serokê CHP Oguz Kaan Salici kir.

Li gor daxuyaniya hatiye belavkirin, di hevdîtinê de Oguz Kaan Salici silavên Serokê CHPê Kemal Kiliçdaroglu bi Serok Barzanî gihandin û ji bilî balkişandina li ser dîroka guhertinên navxweya Tirkiye ragihand ku “demokratxwazî dibe sedemek ji bo pêşketina navçeyê û bi pêwîst zanî ku aliyên demokrat ên navçeyê peywendiyeke dostane li gel hev hebê ji bo pêkanîna dadperwerî û pêşketinê.”

Di daxuyaniyê de hatiye, Cîgirê Serokê CHPê, “tekez li ser girîngî û bandora Herêma Kurdistanê ya li navçeyê û Iraqê kir û xwezyarê ew e bû ku peywendiyên di navbera her du aliyan berfirehtir û kûrtir bibin.”

Li gor daxuyaniyê Serok Barzanî jî di civînê de bi germî bixêrhatina şanda mêvan kir û ragihand ku “qedera gelên navçeyê ew e ku li gel hev bijîn û baştirîn rê jî ji bo wê jiyanê, birayetî û aştî û çareserkirina kêşeyan û nehiştina zimanê înkarkirina beranber e.”

Serok Barzanî tekez jî kir ku “me hemû aliyek pêwîstî bi wê yekê heye sûd ji ezmûn û şaşiyên berê werbigrîn û xizmeta aştî û pêkvejiyana di navbera gelan de bikin.”

Her li gor daxuyaniyê, “Pêşhatên siyasî yên dawî yên li ser asta navçeyê û hilbijartinên pêşerojê ya Iraqê mijarên din ên vê civînê bûn.”

Di vê hevdîtinê de Sekreter Fazil Mîranî û Endamên Mekteba Siyasî Zeîm Elî û Ce'fer Emînkî û Berpirsê Mekteba Navendî ya Peywendiyên Derve yên Partiya Demokrata Kurdistanê Hoşyar Sîweylî amade bûn.

Herwiha Serokwezîrê Hikûmeta Herêma Kurdistanê Mesrûr Barzanî jî îro, pêşwazî li şanda bilind a Partiya Komarî ya Gel (CHP) kir û amaje bi wê kir, Tirkiye welatekî girîng û firehnetew e.

Şanda CHPê di serdana xwe ya Hewlêrê de li gel rayedarên Herêma Kurdistanê û berpirsên Partiya Demokrat a Kurdistanê, Yekîtiya Niştimanî ya Kurdistanê û Tevgera Goranê bicive. Herwiha piştî Hewlêrê, şanda CHPê dê serdana Kerkûkê jî bike û li wir ligel Eniya Tirkmenî bicive.

Şanda CHPê ya di bin serpereştiya Alîkarê Serokê Giştî Oguz Kaan Salıcı de, ji Parlamenter û Şêwirmendê Polîtîkayên Derve yê CHP Unal Çevikoz, Endamê Fraksyona CHPê Nevaf Bilek, Prof. Dr. Mehmet Hasan û Enver Omur Polat pêk tê.

Medya Tirkiyê belav kiriye ku CHP girîngiyê bi aştiya Rojhilata Navîn, berjewendî û mafên navçeyî dide û tê gotin: "Di serdanê de bo aştiya navçeyê, dê tekezî li ser avakirina Sazimana Hevkarî û Aştiya Rojhilata Navîn bê kirin ku ji aliyê Kemal Kilicdaroglu ve hatiye ragihandin.”

CHP tekez dike ku divê ligel cîranan rêyên diyalogê vekirî bin û dibêje: "Em dê wek opozîsyona serekî, bo aramiya li Rojhilata Navîn li ser berpisyariya xwe û pêngavên xwe yên erênî berdewam bin."

Rûdaw