Endamê Komîteya Navendî ya PDKyê Şaxewan Ebdulah diyar kir ku eger Kurd nebin yek dê li Bexdayê winda bikin.

Endamê Komîteya Navendî ya Partiya Demokrat a Kurdistanê (PDK) Ebdulah ragihand, eger aliyên Herêma Kurdustanê bi awayekî belav û ji hev cuda herin Bexdayê, ew dê beşekî mafên Kurdan ji dest bidin.

Li gorî gotina Şaxewan Ebdulah parçebûna Kurdan a li Bexdayê dê ziyanê bigihîne pêgeha Kurdan a li Bexdayê.

Endamê Komîteya Navendî ya PDKyê bû mêvanê bultena demjimêr 12:00an a Tora Medyayî ya Rûdawê ku Senger Ebdulrehman pêşkêş dike.

Şaxewan Ebdulah hûrgiliyên qonaxa bê ya pêkanîna hikûmeta Îraqê, pêwendiyên navbera aliyan nirxandin.

"Divê Kurd bi tîmeke hevbeş herin Bexdayê"

Ebdulah teqezî kir ku divê Kurd bi yek dengî tevlî dan û standinên pêkanîna hikûmetê bibin û got:

"Eger YNK bi tena serê xwe û PDK jî bi tena serê xwe here, mafê nêzîkî 10 heta 15 kursiyan dişewitin.”

Şaxewan Ebdulah eşkere kir ku destpêşxeriyeke Serok Barzanî ya ji bo yekdengiya Kurdan heye û hêvî xwest ku hemû alî bersivê bidinê.

Wergirtina şeş wezaretan ji bo Kurdan

Endamê Komîteya Navendî ya PDKyê li ser para Kurdan a di kabîneya bê ya Bexdayê jî de axivî û diyar kir ku ya baş ew e ku Kurd pêşî wekî "pêkhate" daxwaza hemû mafên xwe bikin ne wekî partiyan.

Şaxewan Ebdulah di berdewamiyê jî de got, "Serdema kabîneya Ebadî Kurdan karîbûn 6 wezaretan wergirin lê piştre ji ber beşdarnebûna hemû aliyên Kurd ew hejmar daket 4 wezaretan.

Loma dibe ku Kurd hemû postan wergirin û paşê di nav xwe de parve bikin."

Meaş dibe mercê dan û standinan

Endamê Komîteya Navendî ya PDKyê pêşniyareke nû kir da ku mijara meaşan tevli dan û standinên siyasî bikin.

Şaxewan Ebdulah got,"Dan û standin di demekê de ne ku metirsî li ser meaşên du mehan ên karmendên Herêma Kurdistanê heye.

Dikare wekî nîşaneya niyeta pak daxwaz ji aliyê Îraqî were kirin ku mûçeyan bişînin da ku pirsgirêk çareser bibe. "

"Teyf Samî ne siyasetmedar e û yasayan bin pê dike"

Şaxewan Ebdulah, Wezîra Darayî ya Îraqê Teyf Samî wekî keseke "nesiyasî" pênase kir û got,"Tenê ji bo birêvebiriyê guncaw e, ne ji bo wezîrtiyê.

Teyf Samiyê 50 milyar dînar ji budceya Madeya 140î ji bo parêzgeha Besrayê xerc kiriye, ev yek di demekê de ku pêdiviya Kerkûk û Xaneqînê ji bo qerebûkirinê bi wî pereyî hebû."

Ebdulah her wiha got: "Ez pêşbînî nakim Teyf Samî careke din bibe wezîr, ji ber ku ji xeynî Kurdan aliyên din jî jê dilgiran in."

15 roj li pêşiya parlamentoyê ne

Şaxewan Ebdulah behsa dema destpêkirina rûniştinên Parlamentoya Îraqê kir û pêşbînî dike ku heta pêncşemê Dadgeha Federal a Îraqê encamên hilbijartinan pesend bike.

Ebdulah di dawiyê de got, "Piştî pesendkirina navan, li gorî Madeya 72yê ya destûrê, tenê 15 roj li pêşiya yekem rûniştina parlamentoyê hene loma divê alî di lihevkirinê de lezê bikin."