Şerê Sûrîye ra verî Rojavayê Kurdistanî de 15 hezarî Kurdê Êzîdî estbî. La şer û pêrodayîşan ver xeylê Kurdê Êzîdî verê xo dayê welatanê bînan û nika vajîyeno ke Rojava tena 5 hezar Kurdê Êzîdî mendê. 

Rîyê şerê Sûrîye ra mîlyonan merdimî ca û warê xo caverday û verê xo dayê welatanê bînan. 8 serrîyo ke Sûrîye de şer esto. Rîyê Tirkîya û terorîstanê cîhadîstan ra şarê Sûrîye bîyo perçe-perçe.

Kurdê Êzîdî zî nê şerî ver zerarêko pîl dî. Goreyo ke vajîyeno serra 2007î de Rojavayê Kurdistanî de 15 hezar Kurdê Êzîdî estbî. La nika pêro-pîya 5 hezar Kurdê Êzîdî Rojava de mendê.

Se ra 70ê Êzîdîyan Efrîn de mendêne. La semedo ke dewleta Tirkîya dest rona Efrînî ser, Kurdê Êzîdî uca de raştê zulum û neheqî ameyî. Kurdê Êzîdî hema vaje pêro Efrîn ra koç kerd.

Rojava de se ra zêde dewê Êzîdîyan estê. Kurdê Êzîdî tewr zaf Efrîn de estbî, heto bîn ra Derik, Tirbespi, Haseki, Amude û Serêkanî de zî dewê Êzîdîyan estê.

Bi no qayde Rojavayê Kurdistanî de estbîyayîşê Êzîdîyan binê tehlukeyî de yo.