Dezgehanê bawerîye yê Elewîyan vara projeyê turîzmî yê Çimeyanê Munzurî yê ke seba Elewîyan mekanê pîroz ê  reaksîyon da û va: No vera pîrozanê ma hêrişêk o û ganî cade bêro vindarnayene.

Projeyê  “qezenckerdişê tûrîzmî” yê Çimeyanê Munzurî yê ke hetê şarê qezaya Pulurî ya Dêrsimî ra sey pîroz yenê qebûlkerdene hetê Heyetê Herêmî yê Pawitişê Estbîyayîşanê Kulturîyan ê Erziromî ra ameyo tesdîqkerdene. Dezgehê Elewîyan ê ke nê projeyî sey hêrişê vera bawerîya xo  vînenê waşt ke no proje cade bêro vindarneyene.

 Walîyê Dêrsimî Tûncay Sonelî da zanayene ke  malîyetê projeyî 8 mîlyon o û înan bi heme sazî û dezgehanê cimatî yê  Dêrsimî no proje amade kerdo. La dezgehanê bawerîye vera naye reaksîyon da û ard ziwan ke vatişê Sonelî raşt nêya. Komeleya Elewîyan a Demokratîke (DAD)  û Komaleya Pîr Sûltan Abdalî ard ziwan ke  derheqê projeyî de fikrê înan nêameyo persayene û  waşt  ke no proje cade bêro vindarnayene.

No Projê Vera Bawerîye û Kulturê Elewîyan o

Hemserekê DAD’î Mûsa Kûlûyî no proje se sey vera pîrozanê înan hêrişêk name kerd û va: ‘’Wazenê ke Çimeyanê Munzurî bixeripnê û ahşap bikerê bi naye ruhê nê cayê pîrozî werte ra wedarenenê. No bewerîye çîn hesibnayîş o.  No proje vera bawerîye û kulturê Elewîyan o. Ma do çirey destûr naye nêdê. Ma vera nê porjeyî yê û ganî cade bêro vindarnayene.’’

Ma Destûr Nêdanî Kes Hêrişê Pîrozanê Ma Bikero
Îdarekaranê Komaleya Pîr Sûltan Abdalî ra Alî Ekber Kayayî zî  vist vîr ke Çimeyê Munzurî tewr muhîmî ê pîrozanê înan ra yê û va: ‘’Walî û qeymeqem semedê xizmetê şarî estê, ê bê şarî nêeşkenê nê projeyan bîyarê ca. No proje zirar dano bawerîya ma, şar ey nêwazeno û ganî cade bêro vindarnayene. Tîya de yeno waştene ke bawerîye û felsefeyê Elewîyan bêro çînkerdene.’’