Merkezê Xeberan- PAK û PSKyî roja 17.12.2019 de bi semînerêk, Teşkîlatê Amedî yê PSKyî  de Roja Alaya Kurdistanî Pîroz Kerde.

Semînerê pîrozkerdena Roja Alaya Kurdistanî bi seba şehîdanê Kurdistanî rêzgirewtiş dest pêkerd. 

Xeylê endamê PSK û PAKî, ronşvîr, nuştoxî, sîyasetmedarê Kurdî û  rojnamegerî û welatî beşdarê semînerê  pîrozkerdişê Roja Alaya Kurdistanî bîyî.  

Ewilî bi minasebetê Roja Alaya Kurdistanî beyanato hempar yê PAK û PSKyî hetê Endamê Komîteya Rayverî yê Merkezî yê PSKyî Ramazan Morayî ra ame wendiş. Dima ra zî cigêrayox Ahmed Kanîyî derheqê Alaya Kurdistanî de semînerêko hîra da. 

Beyanato hempar yê PSK û PAKî wina yo:

‘’Ma Roja Alaya Rengîne bi fehmêko neteweyî pîroz kenê 

Ma sey milleta Kurd Roja Alaya Kurdistanî bi fahmêko neteweyî pîroz kenê. Ma hetêk ra zî semedê xurtkerdiş û berzkerdişê şiûrê neteweyî Alaya Kurdistanî hêz û îlham gênê.  

Emser hetêk ra zî seserrîya Alaya Kurdistanî ya.  

Se serrî verî, 1920î de Alaya Kurdistanî hetê Cemiyetê Komela Kurdistanî ra (Kurdistan Teşkîlat-ı İçtimaiye Cemiyetî)  amey nexşkerdiş; bi hîrê şerîdê kesk, sipî û sûr û ortê ci de zî 21 zerqê rojî yê zerdî…  

Ma seserrîya Alaya Kurdistanî de sereberz ê. 

Alaya Rengîne tena sembolê azadî ney, sembolê xelisyayîşî û xoserîya Kurdistanî ya. Alaya Rengîne na se serra  ke rayşîyayîş û têkoşînê azadî û xoserîye de rayverîya şarê Kurdî kena, demanê tengan de, tengayî û temîyanbîyayîşanê pîlan de rayîrê ma roştî kena, hêvîyanê ma zêde kena. 

Alaya Rengîne rayîrê têkoşînê ma yê seserre de vernîya ma akerda û rayîr mojnaya ma.  

Şarê ma yo camêrd serê seserra vîstan de pê roştîya Alaya Rengîne xoverrodayîşêko pîl nîşan da. Badê ke têkoşîn,  xebata Bakurî nêşî sere, Alaya Rengîne Rojavayê welatê ma de destê Xoybûnî de bîye berze. Alaya Rengîne serranê 1930î de şewqê xo Koyê Agirî ser o vila kerd.  

Alaya Rengîne uca ra resa Rojhelatê welatê ma. Komêk Ciwanê Kurd 17ê Teşrîna Peyêne ya serra 1945î de Alaya Rengîne Mahabad de awanîya dadgehî ser o aliqnay. Alaya Rengîne Komara Mahabadî hem bîy şahidê serkewtişî û mijdana azadî, hem zî bîy Ala yewine ya Komara Kurdî. 

Alaya Rengîne asmenê Kurdistanî ser o şîyabî têra.  

Alaya ke Serekkomar Qadî Muhammedî sey emanetêko mîlî teslîmê Mele Mistefa Barzanî kerd, ewro Başûrê Kurdistanî de Parlamentoyî ser o şîyena têra. 

Parlamentoyê Kurdistanî sey qedrzanayîş, tarîxê 11. 11.1999 de, roja 17ê Teşrîna Peyêne, roja ke Alaya Rengine serra 1945î de Dadgehê Mahabadî de ameybî aliqnayîş,  sey Roja Alaya Rengîne îlan kerd. 

Ma baş zanê ke, her milet bi nasnameyê xo  esto; bi ziwan, kultur, tarîx, qîmet û nasnameyê xo yê neteweyî mîyanê keyeyanê miletan de cayê xo gêno. Ê ke miletan sewîyeya tewr berze de temsil kene zî qismêk alaya înan a. 

Alaya Rengîne eserê têkoşînê seserre, nîşanê ked û gonîya bi se hezaran aşiqê azadî ya. 

Alaya Kurdistanî rûmetê ma ya, nîşanê xobawerî û bextewarî ya.  

Ma newe ra Roja Alaya Kurdistanî û seserrîya aye pîroz kenê. 

Ê kesê ke nêverdayê wa Ala Rengîne bigina waro, eksê ci her tim aye berze kerdê, ma înan bi zerrî ra yad kenê. 

17.12. 2019 

Partîya Azadîya Kurdistanî (PAK) 

Partîya Sosyalîst a Kurdistanî (PSK) ‘’

Beyanatê PAK û PSKyî ra dima, tarîxnas, cigêrayox û nuştoxo Kurd Ahmed Kanîyî derheqê tarîxê Alaya Kurdistanî de malumatê hîrayî dayî.

Ronşvîro welatperwer o Kurd Şêx Mîzbah Yarûkî zî şîîra Şaîrê Kurdî Cîgerxwînî yo ke Alaya Kurdistanî ser o nuştbi wend.

Qalîkerdişê Ahmed Kanîyî ra dima semîneri bi perse beşdaran û cewabdayîşê Ahmed Kanî dewam kerd.