Buroya Çapemenî û Têkîye ya PAKî: Şarê Başûrê Kurdistanî Ganî Vera Provokasyonan Hişyar Bo

Şarê Başûrê Kurdistanî reyna raştê provokasyonanê xeyrrnêwazan ameyo. Silêmanîye, Helebçe û Çemçemal de tay kesî, waştişanê meşrû yê şarîl sûîstîmal kenî û bi namê protestoyî de ofîsanê partîyan û dezgeyan û ca û wareyanê şarî rê hêrişanê terorî kenê û zerar danê înan.

Aşkereyo ke, sebebê ci çi beno wa bibo, bi namê protestoyî de, heqê tu kesî çino ke ofîsanê partîyan, dezgeyanê resmî û ca û warê şarî rê hêriş biko. Nê hêrişî ne yenê qebûlkerdene û ne zî kerdênê meşrû yê.

Hol yeno zanayîş ke Rayberîya Bexda, Partîyê Ereban ê ke dişmenetîya Kurdan kenî û dewletê herême yê hevalbend û desteg danê nê xeyrnêwazan, bi heme tewirê hêrîşan, bi plan û projeyên zaf hetî û bi ablûkayê aşkere û mîyankî hewl danê heme qezencanê federe yê Herêma Kurdistane orte ra wedarê. Rayberîya Bexda, budçeya Herêma Kurdistanî ya ke heqêko qanûnî ya, hema vaje pêro birnaya. No zî bîyo sebebê mexdûrîyetêko pîl yê şarê Kurdistanî. Sebebê esasî yê nê qrîzî û neheqî, probleme îktîsadî yê Başûre Kurdistanî , no muameleye Rayberîya Bexda yo. Seba ke Bexda bê mazeret budçeya Herêma Kurdistanî teslîmê ci biko, gere meydanê Mîyannetewî de dîplomasîyêka xurte bêra kerdene.

Mîyanê nê demî de gere şarê Kurdistanî û Rayberîya Federe ya Herêma Kurdistanî, heme tewir şer û alozîyê zereyî ra dûr vindo, gere bi îtîfaq û yewitîya netewî, heme qezencanê federe rê wayîr vejîyo û înan ver bi dewletêka xosere bibero.

Heme kesî baş zanê ke ewro şarê Kurdistanî zî, Rayberîya Federe ya Herêma Kurdistanî zî rastê probelm û astengîyanê pîlan yê ekonomi ameya. Helbet ke wazîfeyo yewin yê Parlamento, Hikûmet û Serekîya Herêma Kurdistanî no yo ke, problemê ekonomî yê şarê Kurdistanî çareser biko, edaletê komelkî bîyaro ca û çimeyanê neweyan nê ekonomî peyda biko. La rayê çareserîya meseleyan no rayîr nîyo û çîyê ke zerar danê qezencanê Kurdistanî nîyo.

Xebate û bernameyê çaksazî, yê caardişê edaletê komelkî û yew kerdiş û awankerdişê dezgehê dewletbîyayîşî, gere bi pawitiş û xurtkerdişê qezencê ke estê û bi xebate û armancê xo yê azadkerdişî, heme qeyd û bendê serdestan pîya bêrê rijnayene.

Heme protestoyê ke heq û azadîyê ekonomî, komelkî û demokratîk yê şarê Kurdistanî pawenê û xo ray û raybazê şîdetî û şîdetî û terorî ra dûrî vindenê, meşrû yê. Hêzê asayîşî yê Hukmatê Herêma Kurdistanî gere protestoyê ke teror û şîdetî ra dûr ê rê hurmet nişan bido.

Rayberîya Herêma Kurdistanî bi tecrubeyê xo yê 29 serre, pa heme kêmasîyan zî, îspat kerda ke Herêma Kurdistanî, Rojhilatê Mîyanên de girawêka demokrasî ya û gere her bi helwest û bi kerdenanê xo zî na girawa demokrasî aver bero û ciwantêr biko.

Nê hedîseyê ke deme peyînî de Silêmanîye, Helebçe û Çemçemal de bîyê reyna nîşanê ma danê ke tay xeyrnêwazî, bi namê protestoyî, bi rayîr û raybazê terorî û şîdet û bi provokasyonan wazenê plananê xo yê qilêrinan bîyarê ca. Gere ma waştişanê meşru yê şarî rê hürmet nişan bide, la tu eleqeyê nê provokatoran bi heq û waştişanê meşrû yê şarî de çin yo.

Şarê Kurdistanî bi hest û hişmendîya xo ya welatperwerane û bi nê tecrubeyanê xo yê dewlemend, gere vera heme tewir provokasyonan hişyar bo.

Ma kesê ke bîyayîşan de wefat kerdê, keyeyanê înan ra serweşîye wazenê, homa şîfaya xeyrî bido birîndaran.

09.12.2020

Buroya Çapemenî û Têkîye ya PAKî