Merkezê Xeberan

“Dewleta Îranê heqê benzînî kerd zêde û dima ra Rojhilatê Kurdistanî û li Îranî de des hezaran kesî bi protestoyan, bi grev û çalakîyê sivîl zêdekerdişê heqê benzînî protesto kerd.

Dewleta Îranî protestoyan rê bi şeklo kovane mudaxele kerd. Rojhilatê Kurdistanî û Îranî de heta nika netîceyê nê hêrişan de desan kesî amê kiştene, sesan kesî zî birîndar bîyê. Protestoyê şarî hîna zî bi şeklo komkî dewam kenê.

Nê protestoyê ke ewro Rojhilatê Kurdistanî û Îranî de benê, eslê xo de, verba feqîrîye, vayîye û  çinbîyayena xizmetî  benê; verba zulum, zordarîye û neheqîye de serewedaritiş o;  verba qebûlnêkerdişê heqanê netewî û demokratîk yê şarê kurdî;  verab çînbîyayena demokrasî û verba binpaykerdişê heq û azadîyê heme qismê komelkî, dînî, etnîkî, mezhebî, cinsî;  verba îdam û kerdenê bê însanî yê Dewleta Îranî xoverrodayîşêk o.

Wezîrê Karanê Teberî yê Amerîka Mike Pompeoyî nê protestoyanê şarê Rojhilatê Kurdistanî û Îranî ra dima beyanatêk da ûva ‘Amerîka vengê şima eşnawena, Amerîka hetkarî dana şima, Amerîka kişta şima de ca gêna’. Helbet ke hetkarîya Amerîka û dewletanê Rojawanî seba şarê Rojhilatî Kurdistanî û Îranî zaf qîmetin a.

La ma zanê ke Donald Trumpî Rojavayê Kurdistanî de Kurdî tena verdayî û destûr da ke wa Tirkîya hêrişê Rojavayê Kurdistanî biko. Gelo qey Kurdî do bieşkê seke çîyêk nêbîyo Amerîka rê bawer bikî? Qisur ci meewnêne zaf zehmeto ke merdim cewabêko pozîtîf bido na perse. Û nê sîyaseto bêîstîkrar o ke Danild Trump keno zî eslê xo de seba Kurdan bêşansîyêk o zî.

Têkoşînê şaranê Rojhilatê Kurdistanî û Îranê uo ke verba Dewleta Îranî de yeno dayene, helbet ke lazimtîya ci Amerîka û dewletanê Rojawanî rê esto. La gama ke ma ewnîyenê helwestê Trumpî yê Rojavayê Kurdistanî, ma vînenê ke no, hetêk ra zî bîyo sebebê bêbawerîyêka pîle,  hetêk ra zî şans û hêvîya şaranê Rojhilatê Kurdistanî û Îranî zeîf keno.

Ma têkoşîno ke şarê ma yê Rojhilatê Kurdistanî seba azadî, seba edalet, demokrasî û cuyêko bi rûmet dano, sey têkoşînê xo vînenê û ma kişta waye û birayanê xo yê Rojhilatê Kurdistanî de ca gênê û ma hetkarî dane înan.

Ewro Rojhilatê Kurdistanî de nabênê heme partîyanan de ronayîşê îtîfaqê netewî û demokratik heme deman ra zêde lazim o û tarîxî yo. Ma na baweîye de yê ke, partîyê Rojhilatê Kurdistanî  bi na hişmendî û hestyarî do gamanê muhîman bierzê.

Îtîfaqê netewî û demokratîk yê nabênê partîyanê Rojhilatê Kurdistanî de do hemkarî û îtîfaqê nabênê şarê Îranî û Kurdan zî bihêztir biko, do têkoşînê vera Dewleta Îranî xurtêr biko.

Ma na bawerîye de yê ke, no demo ke pê zehmetîyan vîyareno de, gereke wayî û birayê ma yê  Rojhilatê Kurdistanî nê di xususan de hişyar, hesas û  haye bê: A yewine, gereke heta ke bieşkê meydanê mîyannetewî de dişmenanaê xo kêm û dostanê xo zêde bikê. A diyîne zî vate û waedanê tikê dewletan ser o baro ke qawetê xo ra zêdêr o nêgêrê xo ser .

Ma hetkarî danê protestoyanê komkî yê meşrû û şîdet û tûjîye ra dûr yê Kurd û Faris û Azerî  û Ereban û heme şaranê Rojhilatê Kurdistanî û Îranî.

Em şîdet û hêrişê Dewleta Îranî yê ke protestoyanê sivîl rê benê şermezar kenê.

Ma veng danê Netewê Yewbîyayî, Amerîka, Rûsya, Yewîya Awrupa, Komkara Erebî, rêxistinê mîyannetewî yê heqanê merdiman, raya pêroyî ya dinya û wazenê wa seba têkoşînê azadî, demokrasi û edaletî hetkarî bidê şarê Îranî û Rojhilatê Kurdistanî. Gereke şima pêro-pîya na kerdena Dewleta Îranî ya ke merdimanî ra dûr a rê vajê ‘bes o’.”

18.11.2019

Buroya Çapemenî û Têkilîye ya PAKî