Merkezê Xeberan - Rêxistina Koçî ya Neteweyanê Yewbîyayeyan da zanayene ke sînor de tewr tay 13 hezar koçberî estî.

Rêxistine eşkera kerd ke mîyanê koçberan de keyeyê bi domanan zî estê.

Yewîya Ewropa biqesawet a

Dima ke Serekkomar Recep Tayyîp Erdoganî bire daye ke multecîyan derbazê sînorî bikero Yewîya Ewropa zî eşkerayîyêke daye.

Sereka Komîsyonê Ewropa Ursula Von Der Leyen twitter de eşkerayîyêke weşanaye û vat ke ê koçê koçberan ê ver bi sînorê Yunanîstanî û Bulgarîstanî bi 'qesawetî' teqîb kenê.

Leyene vat: ''Safhayêka winasêne ke karê ma yo verên no yo ke ma bi xurtî paştî bidê Yunanîstan û Bulgarîstan. Sere de bi rayîrê Frontexî (Dezgehê Çimdarîya Sînorî yê Yewîya Ewropa) ma amade yê ke sînor de paştdayîşêkê xurtî bikerê.''

Goreyê Soyluyî 47 hezar koçberî şîyî Ewropa

Goreyê Wezîrê Karanê Teberî Suleyman Soyluyî roja şemeyî heta saete 23:50î 47 hezar û 113 koçberî Edîrne ra resayî Ewropa. Labelê no zanayîş hetê çimeyanê xoseran ra nêame tesdîqkerdene.

Bazirganê merdiman: Erdogan

Rejîmê tirkî yo ke paştî dano cerganê Sûrîye bi hedefê hêzanê Şamî û netîce de bi desan leşkerê tirkî kişîyayî. Goreyê bîlançoya selahîyetdaranê tirkî 33 leşkerî kişîyayê la çimeyanê herêmîyan vat ke na hûmara hîna zêdêr a. Nê serebûtî ra dima Erdoganî berê sînoran akerdî. Bazirgananê merdiman ê ke pabesteyê Erdoganî yê koçberî bi hawayêkê nîzamî berdî sînoran ke no bi dîmenan zî ame mojnayene. Tirkîya bi serran o ke koçberan vera Ewropa sey çekêka stratejîke xebitneno.