Navenda Nûçeyan - Xebat û kempêna hikûmeta Kurdistanê li dijî belavbûna nexweşîya Koronayê û nehîştina wê nexweşîyê didome. Li alîyekî din alîkarîyên kesên xêrxwaz û dewlemend jî roj bi roj zêde didin.

Li seyrangeha Bêxal, ku li nêzîkî bajarokê Riwandiz yê Başûrê Kurdistanê, hotêleka mezin bi navê Hotêl Mazîyar heye ku mezintirîn hotêla tûrîstî ye li wê deverê. Ew hotêl ya sê kesan e. Wan şirîkan hotêla xwe dan hikûmetê da ku di çarçoveya kempêna nehîştina Koronayê de mifayê jê bibîne.

Li ser vê mijarê, yek ji xwedanên hotêlê bi navê Îsa Mihemed ji BasNewsê re got, min û şirîkên xwe (şêx Mehdî Şêxanî û Qaîd Simko) me biryar da hotêla xwe teslîmî hikûmetê û wezareta tenduristîyê bikin heta ku vîrusa Koronayê xilas dibe.

Îsa Mihemed her wiha got, hotêla me ji zêdetir ji 200 textan pêk tê. Me bi her tiştî ve da hikûmetê. Me teslîmî qaymeqamê Soran Kirmanc Izet û berpirsê tenduristîya Soran, dr. Karwan Cemal kir da ku mifayê jê bibînin.

Bajarokê Riwandiz girêdayî bajarê Soran e.