Navenda Nûçeyan - Nûnerê Îlamê li parlamentoya Îranê, Selam Emînî ragihand: “Termê wê keça 11 salî ya Îlamî ku mehek berî niha xwe kuştibû, li nêzîk mala wan bi axê hatîye spartin.”

Selam Emînî herwiha got, “ji ber hejarîyê malbata wê keçê nekarîne gorekê bo keça xwe bikirin, lewma neçar bûne ku termê wê li nêzîkî mala xwe veşêrin.”

Nûnerê Îlamê li parlamentoya Îranê destnîşan kir, ku rêjeya hejarîyê li parêzgeha Îlamê di astekê de ye, ku bûye sedem rêjeya herî zêde ya xwekuştina zarok û nûciwanan li ser asta Îranê li wê parêzgehê be.

Bi gotina wî parlamenterê Kurd, di xwekuştinê de parêzgeha Îlamê li ser asta hemû Îranê bi pileya yekem tê, ew yek di demekê de ye, ku Îlamê kêmtirîn rêjeya nîştecihan di nava tevahîya parêzgehên Îranê de heye.

Roja 12ê Nîsana îsal (2020), keçeke 11 salî ya Îlam li navçeya Helîlanê ji ber hejarîyê xwe kuştibû, lê berîya ku xwe bikuje kincên xwe şewitandibûn, daku kes nebîne û xelk nezanin ku çi qas hejar bûne.

Nûçeya xwekuştina wê keça Kurd a Îlamî di medyayên Îranê de jî deng vedaye û karîkatorîstê navdarê Îranî Mana Nêyêstanî jî karîkotorek li ser xwekuştina wê keçê çê kir.

Rûdaw