Li bajarê Dirbêsiyê yê Rojavayê Kurdistanê ji aliyê kesên nenaskirî ve bi bombeyekê êrişî ser ofîsa ENKSê hat kirin û li ser dîwarên ofîsa PDK-S jî nivîsên tehdîdwarî hatin nivîsandin.

Serokê Encûmena Xwecihî ya Encûmena Niştimaniya Kurdî ya li Sûriyê (ENKS) ya li Dirbêsiyê, Omer Emo ji Rûdawê re ragihand,  “îro demijmêr 2:50 xulek serê sibehê grûpeke 3 kesî ku li matorekê siwar bibûn, dergehê ofîsa wan şikandine û bombeyeke destî avêtine nava ofîsê.”

Omer Emo wê êrîşê weke “karekî terorîstî” bi nav dike û dibêje, “ev êrîş xizmeta doza Kurd û diyaloga Kurdî-Kurdî li Rojavayê Kurdistanê nake.”

Endamê Komîteya Navendî ya Partiya Demokrata Kurd li Sûriyê (PDK-S), Hesen Remzî jî ji Rûdawê re got, serê sibeha îro dergehê Ofîsa partiya wan a li bajarê Dirbêsiyê hatiye şikandin û “nivîsînên xirab ên tehdîdwarî li ser ofîsê hatine nivîsandin.” 

Roja 23ê meha bihorî jî Ofîsa PDK-Sê ya li bajarê Amûdê hatibû şewitandin, PDK-Sê partiya PYDê bi wê yekê tohmetbar kiribû.

Heta niha hêzên Asayişa Rêveberiya Xweser tu daxuyanî di derbarê êrîşa li ser wan ofîsan de belav nekiriye.