Kurd-Kavî roja 16ê Adara 2024î  bi minasebetê Serroja Jenosîdê Helebçeyî ra kombîyayîşê yadkerdişî viraşt.

Xeylê hunermendî, sîyasetmedarê Kurd, roşinvîrî ameyî cayê kombîyayîşî.

Serekê Kurd-Kavî  Mehmet Celal Baykarayî semedê kesanê ke qelîmaê Heşebçeyî de ameybî kiştene û semedê heme şehîdan waşt wa deqeyêk rêx bêro girewtene.

Badê zî kombîyayîş bi temaşekerdişê fîlmo ke derheqê Jenosîdê Helebçeyî de ameyo antene dewam kerd.

Badê temaşekerdişê fîlmî serekê Kurd-Kavî Celal Baykara, serekê PWKyî Mustafa Özçelik, endamê Kurd-Kavî Remzi Çakın, endamê Heyetê Pêroyî Mehmet Gül û Mazhar Kara qiseykerdişêk kerd. 

Celal Baykarayî qiseykerdişê xo de da zanayîş ke, no jenosîd xisusî Kurdan ser o ameyo kerdene, behsê qetlîmanê Koçgîrî, Agirî, Zîlanû Dêrsimî kerd û derheqê Jenosîdê Helebçeyî de zanayîşî dayî. Baykarayî va; “ Ewro zî hetê kulturî û ekonomî ra Kurdan ser o jenosîd dewam keno.”

Serekê PWKyî  Mustafa Özçelik zî derheqê Jenosîdê Helebçeyî  de zanayîşî dayî û îzah kerd ke, semedo ke Kurdî mîyanê xo de nêeşkenê bibê yew,  rastê nê çîyan yenê û wîna va. "Çîyo rast û qîmetin no yo ke Kurdî mîyanê xo de bibê yew. Eke Kurdî yewîya xo nêronê beno ke hema zaf rey rastê nê jenosîdan bêrê. "

Endamê Kurd –Kavî Remzi Çakınî zî behsê Jenosîdê Helebçeyî kerd û qetlîamî şermezar kerd.

Endamê Heyetê Pêroyî yê Kurd-Kavî  Mehmet Gülî zî derheqê hepsîyanê ke wextê qetlîamî de hepisxaneyan de bî de malumat da.