Wezîfedaranê tirkan eşkare kerd ke hezar û 464 gedeyî erdlerzî ra dime bêwayîr ê. Nasnameyê 267 gedeyan zî hema tespît nêbîyo. Komeleya Verê Gedeyî û Cinîyî zî do seba îdîayanê ke vanê, gedeyan danê terîqet û mafyayan, do gerre bikera.

Wezîfedaranê tirkan seba gedeyanê mexdûrê erdlerzî eşkerayîye vila kerde.

Eşkerayîye wina ame vatene; ‘‘1464 gedeyî mexdûrê erdlerzî est ê ke hetê înan de kes çin o, 759 gedeyî hema tedawî benê, 79 gedeyî tedawî bîyî, 626 gedeyî zî bi tespîtkerdişê nasnameyî ra dima keyeyanê înan rê teslîm bîyî, nasnameyê 1197 gedeyan ameyo tespîtkerdene û 267 gedeyî est ê ke nasnameyê înan hema nêameyo tespîtkerdene.’’

Komeleya Verê Gedeyî û Cinîyî, do gerre bikera

Yeno îdîakerdene ke, gedeyê ke herêma erdlerzî de bêwayîr ê, înan danê terîqet û mafyayanê organan.

Komela Verê Gedeyî û Cinîyî dîyar kerde ke, seba nê îdîayan do gerre bikera û eşkerayîyêke vila kerde. Eşkerayîye de ame vatene ke, ‘‘Aseno ke ê gedeyî ke binê xirban ra ameyê vetene, hema teslîmê keyeyê xo nêbîyî. Vajîyeno ke kesê ke yenê û xo sey keyeyê ê gedeyan danê naskerdene, gedeyan teslîmê înan kenê. Goreyê zanayîşan ke warê erdlerzî ra ameyî, gedeyî ke binê xirban ra vejîyenê, sazheganê fermî de qeydê înan nêyeno kerdene.

Gedeyê ma bêwayîr nîyî

Ma nêverdanê ke gedeyê ma bikewê destê terîqetan û bêrê îstîsmarkerdene. Terîqet û cemaatî, gedeyan rê hendê erdlerzî felaket ê. gedeyê ma bêwayîr nîyî.’’

Komele gerrekerdişî ra dima do Edlîyeya Antalya ver o eşkerayîya çapemenîye bida û wazena ke wa şar beşdar bibo.