PAK (Partîya Azadîya Kurdistanî), PSK(Partîya Sosyalîst a Kurdistanî), TDK-TEVGER(Tevgera Demokratîk a Kurdistanî), roja 28.02.2022 Amed de TMMOB (Odeya Mihendîs û Mîmaran) reyde û roja 02.03.2022î de DÎSK(Konfederasyona  Şorişger a Sendîkayê Karkeran) û GUNSÎADî (Komeleya Karsaz û Pîşesazê Başûrê Rojhilatî) reyde pêvînayîş kerdî.

Gorê zanayîşê ke resay destê Rûpela nû, Roja 28.02.2022î de heyeta ke mîyan de Mesûlê TDK-TEVGERî Yusuf Aydin, Hetkarê Serekê Pêroyî yê PSKyî Bayram Bozyel, Hetkarê Serekê Pêroyî yê PAKî Vahît Aba estbî, TMMOB ziyaret kerd.

Sekreterê TMMOBî yê Amedî Dogan Hatun, Hemserekê Odeya Mihendîsê Zîraetî Abdusamed Ucaman, Hemsereka Odeya Mîmaran Selma Aslan,  Hemsereka Odeya Mihendîsê Dormeleyî Nûjîyan Yildirim û  3 îdarekarê Odeya Mihendîsê Bînesazîye amey heyeta PAK, PSK, TDK-TEVGERî ver.

Roja 02.03.2022î zî heyeta ke mîyan de Hetkarê Serekê Pêroyî yê PSKyî Bayram Bozyel, Hetkarê Serekê Pêroyî yê PAKî Vahît Aba, Mesulê TDK-TEVGERî M.Can Azabay estbî, DÎSK ziyaret kerd.

Mesulê DÎSKî  Hanîfe Kardaş  û rayberê  DÎSKî amey heyeta PAK, PSK, TDK-TEVGERî ver.

Heto bîn ra roja 02.03.2022î de zî heyeta ke tede Serekê Pêroyî yê PAKî Vahît Aba , Mesûlê TDK-TEVGERî M.Can Azabay, Endamê Meclîsa Partîye  ya PSKyî Zulkuf Baran estbî, GUNSÎAD ziyaret kerd.

Serekê GUNSÎADî Şah Îsmaîl Bedîrhanoglu  û rayberê GUNSÎADî amey heyeta PAK, PSK, TDK-TEVGERî ver.

Hetkarê Serekê Pêroyî yê PAKî Vahît Abayî derheqê nê pêvînayîşan de tay zanayîşî day Rûpela Nû.

Hetkarê Serekê Pêroyî yê PAKî Vahît Abayî wîna va:

‘’Ma sey heyetê PAK, PSK, TDK-TEVGERî nê pêvînayîşan de,  pêşniyarîyê xo yê nuştekî yê derheqê Programê Waştişê Acîl yê miletê Kurd de pêşkêşê TMMOB, DÎSK û GUNSÎADî kerd û înan ra va ’Ma wazenê pêşniyarîyanê şima zî derheqê muhtewaya nê waştişanê acîlan de bigîre û ma pîya, nê waştişanê acîlan ser o,  bi raybazê aştîyane, bi potansîyelê tewr hîra yê Kurdan TEREFÊ KURDÎ awan bike.  Badê ke  TEREFÊ KURDΠ ame awankerdiş, ma wazenê nê waştişanê acîlan ser o, bi heme terefanê Tirkîya reyde zî  dîyalogan bide dest pêkerdene,  hemkarîyan bike’’.

Vahît Abayî derheqê helwesta her hîrê dezgehan de zî va ‘’Rayberê TMMOB, DÎSK û GUNSÎADî nê pêvînayîşan de, bi hawayêko hewl pêşwazîya pêşniyarîyanê ma yê derheqê Programê Waştişê Acîlî yê miletê Kurd de kerdî. Rayberê her sê dezgehan zî va, ganî na xebata tena  hîrê partîyan ser o ney, ganî hîra hîra bêra kerdene ’’.

Heto bîn ra Vahit Abayî va:

‘’Pêvînayîşê PAK, PSK, TDK-TEVGERî yê bi nê armancî do dezgehanê sivîl û dezgehanê meslekî, kesayetê kurd û partî û hereketanê Kurd û Kurdistanî reyde do xeylê bajaranê Kurdistanî û Tirkîya de dewam bikê.  Badê nê pêvînayîşan ma do netîceyê nê pêvînayîşan ser o vinde û gorê ci ma do xerîteya newîye bide verê xo.’’

Rûpela Nû/Amed