Rêxistina Mafên Mirovan li Efrînê belav kir, grûpa çekdar a bi navê Polîsa Serbazî roja 23ê vê mehê bi ser gundê Kurzêlê yê ser bi Efrînê de girt û bi armanca standina pereyan ji gundîyan, 5 mêr û jinek revandin.

Navê kesên hatine revandin wiha ne: Subhî Cuman Sîdo. Welîd Cuman, Ehemd Zekî Îbiş, Ehmed Elo, Hemodî Nûrî Cafer û Yasemîn Îbrahîm Ebdo.

Wê rêxistinê dîyar kir jî, Grubeke ser bi Ceyş El Şerqîyê ve roja 23ê mehê xurtekî bi navê Xelîl Mihemed Elî Îbrahîm revand û heta niha çarenivîsa wî ne dîyar e.

Herwiha da zanîn jî, li gundê Senarê yê ser bi navçeya Şîyê ve, çekdarên grûpa Lîwaya Weqas roja 24ê vê mehê bi darê zorê ketin mala Ebdula Husên Mustefa Axa û pere û kelûpelên malê dizîn.

Ji dema dagîrkirina Efrînê ji alîyê artêşa Tirkîyê û grûpên çekdar ve di 18ê Adara 2018an de, bi hezaran welatîyên Efrînê hatin revandin û beşeke mezin jî hîna revandî ne.