Komîteya Organîzekerdişî ya Festîvala Kultur û Xoza ya Munzurî eşkerayîya xo de heme Dêrsimijî û dostanê Dêrsimî dawetê Festîvala Kultur û Xoza ya Munzurî ya 19’ine ke do mabênê tarîxanê 25-28’ê Temmuze de bêro viraştene kerdî.

Bi wesîleya virazîyayîşê Festîvala Kultur û Xoza ya Munzurî ya 19’ine hetê Komîteya Organîzekerdişî ra eşkerayîyêk amey dayene û veng dîya ke tewrê festîvala ke do 25-28’ê Temmuze de bêro viraştene bibê.

Eşkerayîye de ca dîya nê îfadeyan:

“Festîvala Kultur û Xoza ya Munzurî bi ravêrteyê xo tarîxkîyî yê vîst serrî reyna vil dana û zîl dana… Vîst serrî verî sazîyê ma yê ke seba kultur, bawerî û xozaya Dêrsimî wayîrê qesawetî bîyî prosesê festîvalan da destpêkerdene û no tradîsyon heta ewro ame. Vengkerdişê dewan, çinkerdişê cugehan, talankerdişê xoza, awbendî, fealîyetê madenkarîye, şewatê daristanan, seyd û çîyanê winayênan ser o rojdemî ameyê bewlîkerdene û festîvala ma bi serkewtişî resaya heta bi ewro.

Festîvale Şexsê Nûpelda û Ayazî de Heme Domanan rê Yena Îthafkerdene

Festîvala Kultur û Xoza ya Munzurî ya 19’ine emser zî bi heman rojdemanê giranan yena viraştene. Sazîyî na festîvale de do bi hişmendîya “Na dinya ma rê çewî ra mîras nêmende, ma a domananê xo ra girewte” tê bigêrê. Festîvala emserêne ya ke do Dêrsimijî û dostê Dêrsimî tewrê ci bibê, şexsê Nûpelda û Ayazê ke teqayîşê qezaya Pulurî de cuya xo vînî kerde îthafê heme domanan amîya kerdene.

“Bawerî, Ziwan û Kulturê Xo rê Wayîr Vejîyê”

Festîvala Kultur û Xoza ya Munzurî, cehdê wayîrvejîyayîşê tarîx, kultur, bawerî, ziwan û xozaya xo yo. Ma veng danê heme Dêrsimij û dostanê Dêrsimî ke tewrê Festîvala Kultur û Xoza ya Munzurî ya 19’ine ke do 25-28’ê Temmuze de bêro viraştene bibê. Dêrsimî rê, bawerî, ziwan û kulturê xo rê wayîr vejî, biciwîye û bide ciwînayene!''