Serekomarê Tirkiya Recep Tayyip Erdoganî Serekê Herêma Kurdistanî Nêçîrvan Barzanî rê telefon akerd û semedo ke sey Serekê Herêma Kurdiatanî ameyo weçînayîş o pîroz kerd.

 Erdoganî waşt wa Serek Neçîrvan Barzanî demêko kilm de Tirkîya zîyaret bikero.
Nêçîrvan Barzanî zî seba telefonkerdişê ey Erdoganî rê sipas kerd, keyfweşîya xo îzah kerd û va: Herêma Kurdistanî semedo ke Tirkîya dir her het ra têkilîya xo weş bikero hadre ya.

Heto bîn ra Hemserekanê Kongreya Komela Demokratîk (KCD) Leyla Guven û Bedran Ozturkî seba Serek Nêçîrvan Barzanî mesajêk day.

Beyanatê KCD de wina ame vatiş: Ma hêvî kenê ke weçînayîşê birêz Nêçîrvan Barzanî do hem bibo wesîleya çar parçeyanê Kurdistanî de yewitîya ma ya neteweyî, hem zî bibo wesîleya xurtbîyayîşê aştî, biratî, demokasî û azadiya şaranê herême.

Şêwirmendê Asayişê Neteweyî yê Amerîka Jonn Boltonî zî bi yew beyanat Serekê Herêma Kurdistanî Nêçîrvan Barzanî pîroz kerd.