Navenda Nûçeyan- Sekretera Giştî ya ENKSê di daxuyanîyekê de ragihand, piştî gera dawîyê ya danûstandinên Astanayê di navbera gerentîkarên “herêma kêmkirina alozîyan” de, li parêzgeha Idlibê deverên sivîlan bi tundî tên bombebarankirin û hejmareke mezin ji zarok, jin û pîran bûne qurbanî û bi dehezaran jî kes koçber bûne.

ENKS di daxuyanîya xwe de bombebarankirina deverên sivîlan ji alîyê hêzên rêjîma Sûrîyê û hevalbendên wê û bikaranîna sivîlan wek mertalên mirovî ji alîyê çekdaran ve şermezar kir.

ENKS daxwaz ji alîyên herêmî û navdewletî yên pêwendîdar dike, şer û kuştina sivîlan li Idlibê rawestînin û rê bidin alîkarîyên mirovî bigihinîn xelkê koçber.

Herwiha daxwaz ji civaka navdewletî jî kir, li gor biryarên navdewletî yên pêwendîdar, bilez çareserîyeke sîyasî ji krîza Sûrîyê re bibînin.

Ji hefteyekê ve ye, gundewarê başûrê Idlibê rastî bombebarana firokeyên rêjîma Sûrîyê û Rûsya tê, ji roja 19ê vê mehê ve jî, hêzên rêjîma Sûrîyê dest bi êrîşa bejahî kirine, di encamê de bi dehan welatîyên sivîl canê xwe jidest dane û bi zêdetir ji sed hezar kes jî koçber bûne.

K24