Bajarê Dêrsimî bi rindîya xozaya xo, rindîya qezayanê xo û tarîxê xo zanîyeno. Dêrsim û qezayê ci bi berardişanê organîk û berardişê xozayî yeno zanayene. Hemwelatijê qezaya Pêrtagî ya Dêrsimî hem baxçeyanê xo de berardişanê organîkan kenî û hem zî heywankarî kenî.

Nê aşman de hemwelatîyê Pêrtagî hewşanê keyeyanê xo de hadreyîya zimistanî kenî. Keyeyê ke hadreyîya zimistanî kenî zî bi hawayo komunal xebetîyenî. Hemwelatî her tewir sebze û fêkîyan baxçeyanê xo ra arê danî û seba zimistanî hadre kenî. Tay hemwelatî zî cew û xele bêjing kenî û dima ra benî arê. Sebzeyan huşt kenî û kenî tirşik. Fêkîyan zî huşk kenî û kenî rîçal. Çerezê sey goz vaman zî baxçeyanê xo de rafînenî û sehnenî. Nê hemwelatijan ra yew zî Sultan Zamure ya. Sultan Zamure îzeh kerd ke ê tena çay û şekir sûke ra herînenî û sewbîna heme çîyanê xo bi destê xo virazenî.

Ez tena çay û şekir sûke ra herînena

Sultan Zamura (65) ke Pêrtagî de cuyena daye zanayene ke toxumê her tewir fêkî û sebzeyan keye de virazena û va: “Ez domanîya xo ra nata karê çinitiş û berardişê fêkî û sebzeyan ra hes ra kena. Ez kerdişê karê her tewir beradişî ra xeylê bextewar a. Ez qetî gubre nêxebetnena. Ma xele, cew, fasulî û niheyan zî kenî toxum. Ma berardişanê xo hem roşenî û hem zî seba zimistanî virazenî. Mi rîçalê fîşne, hêjîr, tuyê sûre û dirrikan viraşte. Ez her tewir çîyan virazena. Ez tena çay û şekir sûke ra herînena û sewbîna heme çîyan bi destê xo virazena. Ard û runê mi zî yê keye yî.”

Wa şar agêro herra xo ser û berardiş bikero

Zamure tewr peynî bale ante cuya bajran sey û wina va: “Çîyê ke bajaran de yenî herînayene heme zî hormonin î û nêweşî virazenî. Domanê ke nika hema newe yenî dinya daxî nêweş î. Çîyê bajaran merdiman nêweş kenî û weşîya merdiman xira kenî. Nika şar bajaran de pîl beno. Bajaran de her çî bi pere yo, la dewa û qezayan de rewşe wina nîya. Wa heskerdişê bajaran nêbo, wa şar agêro herra xo ser û berardiş bikero. Dewlemendîya tewr gird ya merdimîye herra merdimî ya.”