Qezaya Bongilanî ya Çewlîgî de Cengîz Uçaro 25 serrî çend rey Şaredarîya Bongilanî ra kar waşt. La şaredarî cewabêk nêda ci. Uçaro ke betal bi vizêr serê sibayî saete 05:00 de şi verê Şaredarî û xo darde kerd.

Hemwelatîyanê ke pê rewşe hesîyayî xebere day ambulansî û Cengîz Uçar wedarîya Nêweşxaneyê Dewlete yê Bongilanî.

Cengîz Uçar par zî waşt ke bedenê xo verê Şaredarîye de bido adirî ver la şarî nêverda.

Cenazaya Uçarî wedarîya morgî. Medyaya komelkîye de ame vatene ke Uçar esrar şimitêne. La keyeyê Uçarî nê îdîayî red kerdî.

Ame zanayîş ke 4 way û birayê Uçarî zî betal bîyî û par Şaredarê Bongilanî seba karêk soz dabî Uçarî la sozê xo nêard ca. Coka Uçar tim şîyêne Şaredarî  û kar waştêne.