Grûba Morceleyê Kirmanckî û Buroyê Vateyî yê Dîyarbekirî aşme Temmûze de Dîyarbekir de mabênê rojanê 22 û 28î de semedê gedeyan Atolyeya ceribnayîş û Kayan akerdbî.

Gedeyî atolye de ceribnayîşanê kîmyayîyan ser o perwerde dîbî û mirdîya xo keyf kerdbî.

Gedeyan hetê mamostayanê xo ra atolye de nê çîyî mûyayî;

-Ceribnayîşê Teqayîşê Volkanî

-Ceribnayîşê Welwelekî

- Ceribnayîşê Renganê Danskerdoxan

- Ceribnayîşê Adirê destnêveşnayoxî

- Ceribnayîşê Ejderhayî

Gedeyan atolye de seba qiseykerdişî zî kayê weşî kay kerdbî.

Grûba Morceleyê Kirmanckî û Buroyê Vateyî aşkere kerd ke, seba domanan/gedeyan Atolyeya Resim û Hunerî zî aşma Tebaxe de bêra akerdiş. Na, atolyeya dîyin a ke yena tertîpkerdiş.

Aşkerayîya Grûba Morceleyê Kirmanckî û Buroyê Vateyî wîna ame vatiş:

Embazê delalî merheba.

Ma bi nameyê Morceleyê Kirmanckî û Buroyê Vateyî seba domananê/tutanê ma yê kirmancan Atolyeya Resim û Hunerî virazenê. Na, atolyeya ma ya dîyin a.

Gedeyê ma do Buroyê Vateyî yê Dîyarbekirî de bi boyaxanê cîya-cîyayan resman virazê, dinyayêka bîne keşf bikerê, derheqê resmî de teknîkanê cîya-cîyayan bimusê û bişuxulnê û hetê hunerî ra xo aver berê.

Ma paweyê domananê kirmancan ê

Gedeyî do atolyeya diyîne zî nê çîyan bimûsê;

Xebatê Atolyeya Resim û Hunerî

1. Xebata Piroşanayîşê Boyaxan

2. Xebata Dotişê Boyaxan

3. Xebata Bi Pîpete Pifkerdişê Boyaxan

4. Xebata Dewisnayîşê Firçeyî

5. Xebata Moranê Rengînan

6. Xebata Morê Engiştan

7. Xebata Morê Destan

8. Kaxida Zimpara Ser o Xebata Boyaxê Pastelî

9. Xebata Hunerê Layî

10. Xebata Morê Pelan

11. Xebata Boyaxê Guajî

12. Xebata Dotiş û Pifkerdişê Boyaxan

13. Xebata Dotiş û Çarnayîşê Boyaxan

14. Xebata Kaxita Keskesûre

15. Xebata Têmîyankerdişê Rengan

16. Xebata Tîtiknayîşê Qirşikan

Gedeyê mabênê 5-10 serran do bêrê qebûlkerdiş û na atolye zî mabênê rojanê 26-31ê temmûze de bêra akerdiş.

Derheqê muracatî û malumatan de şima eşkenê na numre bigêrî 0533 418 31 41