Baroya Çewlîgî derheqê kiştişê pezkovîyan de beyanatêk da û îzah kerd ke, ê îhaleya seba kiştişê pezkovîyan qebûl nêkenê. Baro seba betalkerdişê qerarî zî muracat kerd.

Wezaretîya Zîretî û Daristanan a Tirkîya 3ê temmuze de pê îhaleyêk destûr dabî ke Çewlîg de 14 pezkovîyî û tay heywanê bînî yê koyî bêrê qetilkerdene. Vera qerarê wezaretî reaksiyon ame nîşandayene.

Baroya Çewlîgî derheqê mesela de beyanatêk da û va; Qerarê Wezaretî qanûnî nîyo.

Beyanatê Baroya Çewlîgî de wîna vajîya: ''Nê heywanî hetê Peymana Bernî ya Ewropa ra yenê pawitene. Seydwanîya nê heywanan do neslê înan çin bika. Ma qebul nêkenê ke pê îhaleyêk neslê înan do çin bibo. Na îhale bêexlaq û bêqanûnî ya. Ma seba batalkerdişê îhale 27ê temmuze de muracat kerd û ma do heta peynî seba naye têkoşîn bike. Ma sere de şarê Çewlîgî, venga pêro hemwelatîyanê hîsgeran danê ke seba batalkerdişê îhale vengê xo biresnê selahîyetdaran û paştî bidê pawitoxanê tebîetî.''