Semedê eşkerakerdişê cayê gorê Şêx Seîd û embazanê ci yê ke hetê dewleta tirke ra ameyî îdamkerdene, do muracat bêro kerdene.

Komeleya Şêx Seîd û Embazanê ci  û Baroyê Amedî bi eşkerayîyêke da zanayene ke ê semedê  musayişê cayê gorê Şêx Seîd û embazanê ci do muracatê Wezîrîya Karanê Zereyî yê Tirkî bikerê.

Eşkerayîya ke Heyeta Konferansî ya Tahîr Elçîyî de ameye kerdene de Serekê Baroyê Amedî Nîhat Erenî qisey kerd. Erenî vat: ''Îdamî ra dima cenazayî nêdîyayî ke zulmê vera kurdan bêro domnayene. Na çarçewe de ge-ge aktorê sîyasîyî qala demê ravêrteyî dir têrîameyîşî kenê. Eke şima wîna vanê, ganî verî serebûtê Şêx Seîd û embazanê ci yo ke dejanê seserrî yê tewr pîlan ra yew o, nê dir bêrê têrî. Têna semedê keyeyanê înan nê semedê heme kurdan zaf muhîm. Kurdî wazenê ke wa cayê goran bêro eşkerakerdene.''

Erenî derheqê muracatî de nê vatî:  ''Xora no muracatêko huqûqî yo. Xusûsê hukme îdarî de Tirkîya de şertanê 1925î ra nata xeylêk çîyî bedilîyayî. Goreyê huqûqê ewroyî mûxatabê ma Wezîrîya Karanê Zereyî ya. Bêşik o ke kesê ke hetê dewleta ra ameyî îdamkerdene hetê dewlete ra ameyî definkerdene. Cenazayî teslîmê keyeyanê înan nêbîyî û hetê dewlete ra mîyan ameyî definkerdene. Eke ma rê zanayîşê nêro dayene ma do dewa abikerê.''

Serekê Komeleya Şêx Seîd û Embazanê ci Mehmet Kasim Firatî zî vist vîrî ke 96 serrî verê cu zî cenazayî ameyî waştene la hema zî nêameyî dayene û vat: ''Muracatî tim bênetîce manenê. Wa temsîlkarê komere goş bidê nê vengî û şarê ma zî wayîrê na dewa vejîyo.''