Merkezê Xeberan - Îdîa beno ke Amed de Polîsan eşt keyeyêk ser û pê kutikan îşkence kerd. Gorê xebera ajansê Mezopotamya polîsan verê çimanê gedeyan de babî û dadîya înan rê îşkence kerd

Amed de 30ê Gulan de  qezaya Baglarî de polîs Atakan Arslan amebi kiştiş. Derheqê kişyayîşê ey de polîsan eşt xeylî keyeyan ser. Vizîr zî polîsan eşt keyeyanê M.E.C. û F.A ser û her di zî seba kişyayîşê polîsan amê tepiştiş.

Emniyetê Amedî de M.E.C. rê îşkence ame kerdiş û polîsan fotografê îşkence medyaya sosyale ser ra vila kerdbî.

Polîsan na rey eşt merdimanê M.E.C. ser. Polîsan berê keyeyê Ş. Yilmaz û M.Yilmaz şikit û kewtî mîyanê keyeyî. Polîsan keye de cigêrayîş kerd û a game kutikêkê polîsan hêrişê şarê keyeyî kerd û polîsan zî temaşe kerd.

Îşkence ra dima wayîrê keyeyî şi Nêweşxaneyê Selahattîn Eyûbî û raporê îşkence girewt.

Avukatê keyeyê Yilmazî Selameddîn Varolî zî da zanayîş ke miwekîlê ey şîyo emnîyet, polîsî gerre kerdî û dima ra şîyo Serdozgerîya Komare ya Amedî û polîsî gerre kerdî.