Paltformê Weşîye yê Amedî aşkere kerd ke her roje şaristan de testê vîrusê Korona yê 300 kesan pozîtîj vejîyeno û pêroyê şaristanî de 600 nêweşê Korona estê. Platformê Weşîye yê Amedî seba tedbîran zî îqaz kerd.

Platformê Weşîye yê Amedî Odaya Tabîban a Amedî de derheqê doneyanê neweyan ê vîrusê Korona de kombîyayîşêko çapemenîye kerd.

Sereka Odaya Tabîban a Amedî Elîfe Turan kombîyayîş de qisey kerd û da zanayîş  ke şaristan de nêweşî vera-vera zêdîyena.

Beyanarê Platformî de wîna vajîya:

Şaristan de hûmara testan kêm a, seba ke servîsê ciewnîyayîşê giranî qîm nêkenê û nêweşî mirenê.

-Nêweşxaneyanê şaristanî de tewr tay 600 nêweşî estê û înan ra 100 kesî servîsê ciewnîyayîşê giranî de yê.

-Testê vîrusê Korona yê 296 kedkaranê weşîye pozîtîf vejîyayo. Her roje şaristan de testê vîrusê Korona yê 300 kesan pozîtîf vejîyeno.

Platformî îfade kerd ke, tedbîrê ke heta nika ameyî girewtene qîm nêkenê û ganî bi hawayêko sîstematîk testî bêrê kerdene, şarî reyde têkilîyêka xurte bêra ronayene, hûmara testan bêra zedînayîş.