Navenda Nûçeyan- Berpirsê polîtburoya YNKê Mela Bextîyar, ku piştî destnîşankirina Berhem Salih wek serokomarê Iraqê, ji YNKê xeyîdî ye û tevlî ti civînekê nabe, şiroveyek dûr û dirêj li ser rewşa Iraqê kirîye.

Mela Bextîyar di şiroveya xwe de ku li ser rûpela xwe ya facebookê belav kirîye, gotîye, eger ew alozî û xwepêşandanên ku niha li Iraqê dibin, li welatekî demokratîk yê rojava biqewimîya dê çend berpirsên wî welatî ji dest kar berdaban û hatiban dadgehîkirin!

Mela Bextîyar her wiha gotîye, eger xwepêşandan û alozîyên Iraqê berdewam bin û rêjeya kuştina xwepêşanderan jî zêde bibe wê çaxê mezinên şîeyan dê zêdetir dengê xwe bilind bikin. Wê demê yan divê berpirsên Iraqê dest ji kar berdin yan jî bi sedan û hezaran kesên din bikujin!

Bi gotina Mela Bextîyar, qet dûr nîne Iraq mîna Sûrîyê lê were ji ber ku rewşa ku niha Iraqê tê de ye gelekî metirsîdar e.